ҚР ІІМ: Қазақстанның 1200-ден астам азаматына халықаралық іздеу жарияланды
АСТАНА. ҚазАқпарат - Қазақстанның 1200-ден астам азаматына халықаралық іздеу жарияланды. Бұл туралы ҚазАқпараттың ресми сауалына жауап берген ҚР ІІМ Мемлекеттік тіл және ақпарат департаментінің директоры Алмас Сәдубаев мәлім етті.
«Қазіргі уақытта халықаралық іздеуде жүрген 1200-ден астам адам бар. 2013 жыл мен 2016 жылдың 7 айы аралығында Қазақстан Республикасының ішкі істер органдары іздеу салған 646 адам іздеп табылды. Оның ішінде 400-ге жуығы Ресейде, 90-ға жуығы Өзбекстанда, 60-тан астам Қырғызстанда, 20-сы Әзербайжанда ұсталды», - деді А.Сәдубаев.
Сонымен қатар ол қазақстандық полицейлер өз елінде қылмыс жасап, қазақ елінде бой тасалап жүрген 1400-ден астам шетелдік азаматты ұстағандығын атап өтті.
«Оның ішінде 700-ден астамы Ресейдің, 500-ден астамы Өзбекстанның, 80-і Қырғызстанның азаматы және әзербайжандықтар да бар», - деді ол.
