ҚР Қорғаныс министрі Әділбек Жақсыбеков елімізге ресми іссапармен келген өзінің әріптесі Украина Қорғаныс министрі Михаил Ежельмен кездесті
- Қазақстан-Украина әскери ынтымақтастығы 2005 жылғы Әскери-техникалық ынтымақтастық туралы үкіметаралық Қазақстан-Украина келісімі және 1997 жылғы Әскери ынтымақтастық жөніндегі қорғаныс министрліктері арасындағы келісім шеңберінде жүзеге асырылуда, - деді ҚР Қорғаныс министрі Әділбек Жақсыбеков.
- Елбасы - Қазақстан Республикасы Қарулы Күштерінің Жоғарғы Бас қолбасшы Нұрсұлтан Назарбаев Украинамен басым салалардағы, соның ішінде әскери және әскери-техникалық салаларда серіктестік қатынастарды дамыту және ынтымақтастықты нығайтуға үлкен көңіл бөледі.
Әділбек Жақсыбеков жүйелі кездесулерді өткізу екі ел армиясының қарым-қатынастарына үлкен әскер ететіндігін атап өтіп, Украина тарапын Қазақстан армиясындағы жағдаймен таныстырды.
- Қазіргі танда біз Қарулы Күштерімізді сапалық өлшемдерін жақсарту арқылы жетілдіруді жалғастырудамыз. Бұл 2015 жылға дейін Қазақстан армиясының келбетін өзгертуге септігін тигізеді, - деді Қазақстан Қорғаныс министрі. - Біз ең жоғары халықаралық стандарттарға сай күштер мен құралдарды жедел өрістетуге қабілетті кәсіби армия құру жөніндегі Елбасы қойған стратегиялық тапсырмаларды орындаудамыз. Ал осы тапсырманы орындау біздің серіктестеріміздің қолдауынсыз, сондай-ақ шетелдік озық тәжірибені зерттеусіз мүмкін емес.
Бүгінгі таңда ең басты басымдылықтардың бірі отандық қорғаныс-өндірістік кешенді дамыту болып табылады. Осы мәтінде шетел серіктестерімен, соның ішінде Қазақстан қорғаныс ведомствосы үшін маңызды серіктес болып табылатын Украинамен әскери-техникалық ынтымақтастыққа үлкен көңіл бөлінеді.
Ынтымақтастықты ары қарай дамыту және белсенділігін арттыру, сондай-ақ екі елдің қорғаныс ведомстволарының өзара әрекет етуінің құқықтық негізін құру ұмтылысының дәлелі ретінде бірқатар құжаттарға қол қойылды - Қазақстан Қорғаныс министрлігі мен Украина Қорғаныс министрлігі арасында әскери ынтымақтастық туралы келісім, сонымен қатар 2012 жылға арналған ынтымақтастық бағдарламасы.
Қазақстан Қорғаныс министрі Украина Қорғаныс министрін Астанада 2012 жылы 7 мамырда өткізілетін Қазақстан Қарулы күштері құрылуының 20 жылдығын мерекелеуге, сонымен қатар Қазақстан армиясының мерекелік кезеңі қарсанында екінші қазақстандық халықаралық қару-жарақ, әскери техника мен әскери-техникалық мүлік көрмесі «KADEX-2012»-ге де шақырды. Қазақстан Қарулы Күштерінің бүкіл жеке құрамы атынан 6 желтоқсанда 20 жыл толуына орай Украина Қарулы Күштерінің құрылу күнімен құттықтады.
Кездесу аяғында Қазақстан мен Украина Қорғаныс министрлері әскери және әскери-техникалық саладағы қорғаныс ведомстволары арасындағы бірлескен жұмыстың өзара сенімділікті арттыруға және өзара тиімді ынтымақтастықты нығайтуға мүмкіндік беретіндігіне сенім артты.