ҚР Президентінің Польшадағы мемлекеттік сапары басталды

ВАРШАВА. ҚазАқпарат - Бүгін ҚР Президенті Нұрсұлтан Назарбаевтың Польшаға мемлекеттік сапары Варшавадағы Президенттік сарайда аса құрметті қонақты ресми түрде қарсы алу рәсімінен басталды.

Елбасын Польша Президенті Анджей Дуда қарсы алып, құрмет тұғырына шақырды. Салтанатты рәсім құрмет қарауылы командирінің рапортынан басталып, екі елдің ұлттық әнұрандарының орындалуымен жалғасты.  ҚР Президенті құрмет қарауыл сабының алдымен жүрген кезде сарбаздар мен офицерлер құрмет көрсетті.

Атап айтқанда, Нұрсұлтан Назарбаевты қошеметтеу үшін президенттік сарай маңына Қазақстан туларымен Польшада оқып жүрген көптеген студенттер жиналды.

Естеріңізге сала кетейік, 22-23 тамызда Нұрсұлтан Назарбаев Польша Президенті Анджей Дуданың шақыруымен осы елде мемлекеттік сапармен болады.

Екі елдің басшылары сауда-экономикалық, инвестициялық, ауыл шаруашылығы, транзиттік-көліктік және мәдени-гуманитарлық салаларда ынтымақтастықты нығайту жолдарын талқылайды деп күтілуде. Сонымен қатар Мемлекет басшысының Қазақстан-Польша бизнес-форумына қатысуы жоспарланып отыр.

Қазіргі кезде Н. Назарбаев пен А. Дуданың кездесуі өтіп жатыр. Бұдан бөлек, кеңейтілген құрамдағы келіссөздерді жүргізу жоспарлануда. Оның қорытындысы бойынша бірқатар екіжақты құжаттарға қол қою рәсімі өтеді.