ҚР СІМ Ирак түрмесінде отырған қазақстандық әйелдердің жағдайын айтты
Мамыр айында Ирак түрмесінде өмір бойына бас бостандығынан айырылған қазақстандық әйелдер аштық жариялаған еді.
«Дау шыққанда біздің елшілік Иракка барып, ел билігімен, бірнеше жоғары лауазымды өкілмен кездесті. Олар бұл мәселені жіті талқылап, мән-жағдайды анықтады. Өмір бойына бас бостандығынан айыру жазасы берілгендер еш рақымшылыққа ілінбейді екен. Сондықтан біздің азаматшалар аштықты тоқтатты, қазір сол түрмеде жазасын өтеп жатыр. Бірақ, Қазақстан тарапы елшіміз арқылы өз наразылығымызды жеткіздік, келешекте қандай да бір мүмкіндік болса, сол азаматтарымызды елге ауыстыру немесе рақымшылық жасау туралы өтініш білдіреді. Бұл мәселе біздің ерекше бақылауымызда, әзірге қалыпты жағдайда», - деді Айбек Смадияров министрліктің апталық брифингінде.
Бұдан бұрын хабарланғандай, 2019 жылдың қарашасында Ирактан 14 бала Қазақстанға жеткізілді. Алайда олардың аналары өмір бойына бас бостандығынан айырылып, Бағдат (Ирак) түрмесінде жазасын өтеуге қалды.