ҚР Ұлттық музейінде ЭКСПО-2017 көрмесі аясында Қытайдың «Терракот әскерлері» атты бірегей көрмесі өтеді
Меморандумға Қытайдың тарихи бесігі саналатын Шаньси провинциясы Сиань қаласының тарихи құндылықтарды қорғау жөніндегі зерттеу институтында қол қойылды.
«Біздің елдер арасындағы мәдени ынтымақтастық саласындағы бұл келісім «Мәңгілік мұра» ұлттық стратегиялық жобасын және әлемнің дамыған 30 елінің қатарына кіру жөніндегі ұлттық жоспардың 100 қадамын іске асыруда маңызды кезең болып табылады», - деп атап өтті Мәдениет және өнер істері департаментінің директоры Ақтоты Райымқұлова.
Тарих, мәдениет ескерткіштерін сақтау, жаңғырту және консервациялау саласында, білім саласында ынтымақтастық туралы меморандумға ҚР Мәдениет және спорт министрлігінің Мәдениет және өнер істері департаменті мен ҚХР Мәдениет министрлігі Шаньси тарихи құндылықтары департаментінің басшылары қол қойды.
ҚХР Мәдениет министрлігінің шақыруы бойынша өткен Қазақстанның бас мәдени ведомствосы өкілдері сапарының маңызды нәтижесі - Астанада өтетін ЭКСПО халықаралық көрмесі аясында 2017 жылы Қазақстан Республикасының Ұлттық музейінде әйгілі «Терракот әскерлері» көрмесін ұйымдастыру және өткізу уағдаластығы болды.
ҚР Мәдениет және спорт министрлігінің Мәдениет және өнер істері департаментінің директоры Ақтоты Райымқұлова, ҚР Ұлттық музейі директорының орынбасары Жазира Кульбаева, реставрация, сақтау және археология саласының отандық жетекші мамандары кірген қазақстандық делегация ресми сапар барысында Қытайдың жетекші мәдени нысандарында, атап айтқанда Цинь әулеті Бірінші императорының музейінде, Шаньси тарихи музейі, Шаньси провинциясында археология институтында, ШҰАӨ музейінде болды, деп хабарлайды ҚР МСМ баспасөз қызметі.