ҚТЖ-да қызметкерлерді қысқартудың баламасы ретінде қысқартылған жұмыс күні режимін енгізу ұсынылып отыр
Бұл барлық жұмыс орындарын сақтап қалуға бағытталған ең оңтайлы амал ретінде қарастырылуда.
«Бірінші жартыжылдықта негізгі экспорттық тауарлардың бағалық конъюктурасының нашарлауымен байланысты жүк айналымының азаюы, аймақтағы экономика өсімі қарқынының баяулауы, экспорт көлемдерінің 22,4 пайызға төмендеуіне байланысты компания бірқатар дағдарысқа қарсы шараларды қолданып отыр. Шығындар бюджеті оңтайландырылды, материалдар, отын-энергетикалық ресурстарды сатып алу, жөндеу жұмыстары мен сервистік қызмет көрсету, жалпы және әкімшілік шығындар азайтылған», - делінген хабарламада.
Сонымен бірге ұсынылып отырған шаралар компанияның әлеуметтік саясатына әсер етпейді: ағымдағы жылдағы әлеуметтік төлемдердің бюджеті 2014 жылдың деңгейінде қалған. Жұмыскерлерге медициналық сақтандыру, материалдық көмек көрсету, теміржол көлігімен жүру және т.б. бойынша жеңілдіктер ұсынылуда.
«ҚТЖ ҰК» АҚ-ның жол бөлімдері, құрылымдық бөлімшелер, филиалдары мен еншілес ұйымдарының басшыларына ұжымдарда қызметкерлер санын қысқартуға балама ретінде толық емес жұмыс күні режимін енгізу мәселесін талқылап, өндірістік процестің тоқтамауын қамтамасыз ету тапсырылған.