«Қуаныш» волейболдан ел чемпионатында «Жетісу» клубын жеңді
ӨСКЕМЕН. KAZINFORM – Өскемен қаласында волейболдан әйелдердің ұлттық лига командалары арасында өтіп жатқан Қазақстан чемпионатының екінші турында сенбі күні орталық кездесу «Жетісу» (Талдықорған) мен «Қуаныш» (СҚО) арасында болды.

Бұған дейін Марко Гршич жаттықтыратын талдықорғандықтар 28 ұпаймен көш басында келе жатса, Азамат Есімовтің шәкірттері үздік үштікте еді.
Бірінші партияда «Қуаныш» 25:16 есебімен басым түссе, екіншісінде «Жетісу» есе қайырды – 25:17. Бұдан кейін солтүстікқазақстандықтар үшінші партияны (25:19) алса, төртіншісінде есе жіберіп қойды – 23:25.
Шешуші, бесінші сетте есеп 2:5 болған мезетте «Қуаныш» сапындағы Жанна Сыроежкина допты ойынға сәтті қосты – 6:5. Сосын матч соңында да осы жағдай қайталанды. Талдықорғандықтар бес матчболды пайдалана алмай, жеңіліс тапты – 18:20. Қорытынды есеп – 3:2, «Қуаныштың» пайдасында.
Сенбі күні сондай-ақ «Алматы» ақтөбеліктерді 3:2 (21:25, 25:22, 17:25, 25:13, 16:14) тізе бүктірді.
«Қарағанды» Павлодардың «Ертісінен» 3:0 (25:18, 25:14, 25:17) есебімен айласын асырса, «Тұран» (Түркістан) «Ару-Астананы» қапы қалдырды – 3:0 (25:13, 25:17, 25:23).
Соңғы болып алаңға өскемендік «Берел» мен ұлттық лигаға биыл қосылған «Грация KZ» (Орал) командалары шықты. Бірінші кезеңде қосалқы құрам ойыншыларын шығарған «Берел» оралдықтарға есе жіберді – 22:25. Содан кейін негізгі құрамды қосуға тура келді – 25:15, 25:11. 25:8. Жалпы есеп – 3:1.
Турнир кестесінде «Жетісу» 29 ұпаймен бұрынғыша көш бастаса, «Берел» (28 ұпай) екінші орында. Бірақ өскемендіктердің бір ойыны кем. «Қуаныш» 26 ұпаймен үшінші сатыда тұр.
Жексенбі күні кейінге қалдырылған «Берел» - «Ару-Астана» матчы өтеді.
Еске сала кетейік, бұдан бұрын волейболдан Қазақстан чемпионатында «Жетісу» көш басына шыққанын жазған болатынбыз.