Құбырдағы ақау: Майқайың кентіне бүгін кешке су беріле бастайды
ПАВЛОДАР. KAZINFORM — Коммуналдық қызметтер жергілікті атқарушы билік органдармен бірлесіп құбырларды жібіту жұмыстарын аяқтады. Қазіргі сәтте желілерді қысыммен тексеру жүріп жатыр.
Екібастұз қаласының әкімі Аян Бейсекин құбырдағы ақауды қалпына келтіру жұмыстары аяқталуға жақын екені туралы хабарлады.
«Бүгін таңертең сағат 07.30-да жергілікті атқарушы органдар коммуналдық мекемелермен бірге құбырларды қыздыру, жібіту жұмыстарын аяқтады. „Екібастұз қалалық су арнасы“ стансадан 274-ші пикетке дейінгі желі бойын қайталай тексеріп өтеді. Қазіргі уақытта құбыр суға толтырылып, қысыммен тексеру жүргізілуде. Жақын уақытта „Богатыр-Көмір“ АҚ-на су бұратын жапқышты ашады», — деп мәлімдеді әкім.
Құбырлар толтырылып болған соң кешкілік Майқайың кентіне су толыққанды жіберіле бастауы мүмкін.
Еске сала кетейік, 21 ақпан күні Екібастұздан Майқайың кентіне ауызсу жеткізетін үлкен құбыр жарылған еді.
