Құлсары дәрігерлері алғаш рет пышақсыз ота жасады

АТЫРАУ. KAZINFORM – Тасқын су басқан Құлсары қаласында дәрігерлер алғаш рет лапароскопиялық тәсілмен ота жасады. 

Жылыой аудандық орталық ауруханасының бас дәрігері Асулан Абдрахмановтың айтуынша, бұрын дәл мұндай ота қолға алынбаған.

«Бұрын аппендицит, асқазан жарасынан қан кету, жатырдан тыс жүктілік, кіндік және шап жарығына операциялар кесу әдісімен шұғыл әрі жоспарлы түрде жасалған еді. Енді лапароскопиялық ота жасау ісі қолға алынды. Бүгін 36 жастағы азаматқа заман талабына сай лапароскопиялық әдіспен ота жасалды», - дейді Асулан Абдрахманов. 

Оның пікірінше, лапароскопиялық хирургия – науқастың ішкі ағзасына отаны тілік жасамай-ақ орындайтын жаңа әдіс. Бұл тәсілмен ота жасалған емделушіге бір-екі аяғына тұру мүмкіндік жоғары болады. 

«Науқас «Теңіз» кен орнынан аудандық аурухананың қабылдау бөліміне ішінің және оң жақ мықын тұсының ауырсынуы белгілерімен жеткізілді. Оның жағдайына медициналық тексеру жүргізілді. Лабораториялық зерттеу нәтижесінен кейін науқаста аппендицит диагнозы бары нақтыланды. Науқасқа өзінің келісімімен лапароскопиялық әдіспен шұғыл түрде ота жасалды», - деп хабарлады Асулан Абдрахманов. 

Аудан дәрігерлері науқастың жағдайы қалыпты деп бағалап отыр. Науқас аурухананың хирургия бөлімінде ем алуды жалғастырып жатыр. 

Еске сала кетелік, бұған дейін Құлсарыда есепте тұрған 4 мың науқасқа 19 млн теңгенің тегін дәрі-дәрмегі берілмегенін жазған едік.