Құлсары қаласында 500 үйді тасқын су басып, 2400 адам көшірілді
АТЫРАУ. KAZINFORM – Атырау облысындағы Жылыой ауданының орталығы – Құлсары қаласында 500 үй тасқын судың астында қалды.
Атырау облыстық жедел штабтың мәліметіне сүйенсек, Жем өзенінің суы көтеріліп, Құрсай каналы арнасынан асқан.
«Құлсары қаласында 500 үйді тасқын су басты. Қаладан 2 мың 400 тұрғын қауіпсіз аумаққа көшірілді. Тұрғындар арнайы бөлінген қабылдау пункттеріне орналастырылды. Эвакуацияланатын тұрғындар үшін «Теңіз» кен орнында вахталық кенттен жатақханалар дайындалып жатыр», - деп хабарлады облыстық жедел штабтан.
Қазір бөгет салу, нығайту жұмысы жатыр. Оған жергілікті атқарушы органнан, Төтенше жағдайлар, ішкі істер департаменттерінен, №41433 әскери бөлімінен 323 қызметкер, 142 техника тартылған.
«Жылыой ауданында тасқын судан қорғау үшін құм толтырылған 45 мың 452 қап, 174 мың тонна инертті материал төселді. Бұл жұмысқа 4540 ерікті жұмылды», - деп мәлім етті облыстық жедел штабтан.
Еске сала кетелік, бұдан бұрын тасқын судың қаупіне байланысты Жылыой ауданында төтенше жағдай жарияланды.
Күндіз Құлсарыдан Доссорға дейінгі жолдың бір бөлігін су басты.
Бүгін тасқын су Құлсары қаласына кіре бастағанын хабарлаған болатынбыз.
