Құлсарыда 100 үйдің іргетасы құйылып, 78-нің қабырғасы қаланды
АТЫРАУ. KAZINFORM – Атырау облысындағы Құлсары қаласында су тасқынынан кейін 100 үйдің іргетасы құйылып, 78-нің қабырғасы қаланды. Енді үйлердің шатырын жабу, сылау жұмысы басталды.
Атырау облысы әкімінің баспасөз хатшысы Руслан Жұмағазиевтің мәліметінше, Құлсары қаласындағы «Болашақ» шағын ауданында 100 тұрғын үйдің құрылысы жүріп жатыр. Бұл үйлер су тасқыны кезінде баспанасы жарамсыз болған тұрғындарға беріледі.
«Жылыой ауданының орталығы – Құлсары қаласында жаңадан бой көтеретін 100 тұрғын үйдің іргетасы толық құйылды. Ал, 78 үйдің қабырғасын қалау жұмыстары аяқталды. Осындай жұмыстардан соң 34 үйдің шатырын жабу жүріп жатыр. Шатыры толық жабылған 22 үйдің қабырғаларына ішкі, сыртқы сылақ жұмысы басталды», -деп хабарлады Руслан Жұмағазиев.
Оның айтуынша, «Болашақ» шағын ауданында салынып жатқан үйлердің 30-на электр желісі жүргізілген. Сондай-ақ, 16 үйге су және кәріз желісі тартылған.
«Құлсары қаласындағы су тасқынынан зардап шеккен тұрғындарға арналған 80 үйдің құрылысына «Қазақстан халқына» қорынан қаржы бөлінді. Ал, 20 баспана жергілікті бюджеттің қаржысына салынып жатыр. Құрылыс жұмыстарын жүргізу үшін жергілікті 8 мердігер компания таңдалды. Бұл компанияларда жұмыс істеуге 374 адам тартылды», -деп мәлім етті Руслан Жұмағазиев.
Еске сала кетелік, «Қазақстан халқына» қорының баспасөз қызметінен мәлім еткендей, Құлсары қаласында 80 тұрғын үйдің құрылысына 2 млрд 640 млн теңге бөлінген. Мұнда 1 үйді салуға жұмсалатын қаржы 31 млн 975 мың теңгені құрайды.
Типтік үлгідегі жаңа үйлердің әрқайсысының ауданы – 100 шаршы метр. Құлсарыда жаңа тұрғын үйлермен бірге 2 мың орындық Binom мектебін, 300 орындық балабақша нысанын салу жоспарланған. Сондай-ақ шағын аллеялар салынады.
«Тұрғын үйлердің авторлық дизайнын «ETALON PROJECT GROUP» ЖШС дайындады. Бұл серіктестік дизайнның сақталуына бақылау жүргізеді. Ал, техникалық қадағалау «ZAF-Стройсервис» ЖШС-ға жүктеліп отыр», - деп мәлім етті қордың баспасөз қызметінен.
Бұдан бұрын су басқан Құлсары қаласында 100 үйдің құрылысы қалай жүріп жатқанын жазған болатынбыз.
Сондай-ақ, Құлсары халқына үй сатып алуға, жөндеуге 70 млрд теңге аударылғанын хабарлаған едік.
