Құлсарыда бір топ жасөспірім түн ортасында шу шығарған
ҚҰЛСАРЫ. ҚазАқпарат – Атырау облысының Құлсары қаласында бір топ жасөспірім түн ортасында шу шығарған, деп хабарлайды ҚазАқпарат.
Облыстық полиция департаменті баспасөз қызметінің ақпаратына қарағанда, бұл туралы 20 мамыр сағат 23:40 шамасында Жылыой аудандық полиция бөлімінің кезекші бөліміне хабар түскен.
«Бір топ жасөспірім Құлсары қаласындағы Махамбет даңғылында орналасқан «Иранбақ» дәмханасының алдында өзара дауласып, шу шығарған. Осыған байланысты жедел-тергеу тобы көрсетілген орыннан кәмелетке толмаған жасөспірімдерді анықтап, полиция бөлімшесіне жеткізді. Олардың түнгі уақытта заңды өкілдерінсіз тұрғын үйден тыс жерде жүргені үшін ата-аналарына қатысты әкімшілік хаттамалар толтырылды» деп хабарлады департаменттің баспасөз қызметі.
Қазір Жылыой аудандық полиция бөлімі аталған қылмыстық құқық бұзушылық дерегін жан-жақты, толық әрі объективті зерттеу үшін Қылмыстық Кодекстің 293-бабымен (Бұзақылық) сотқа дейінгі тергеу жүргізіп жатыр.
Еске сала кетелік, бұған дейін Теңіз кенішінде аялдамаға қалдырылған сөмке күдік тудырғанын хабарлаған болатынбыз.
