«Құнанбай» Астанаға келді» - баспасөзге шолу

АСТАНА. ҚазАқпарат - «ҚазАқпарат» халықаралық ақпараттық агенттігі 19 мамыр, сейсенбі күні жарық көрген республикалық бұқаралық ақпарат құралдарындағы өзекті мақалаларға шолуды ұсынады.

***

«Егемен Қазақстан» газетінің жазуынша, «ҚазАвтоЖол» ҰК» АҚ ұйымдастыруымен Алматы облысындағы «Алматы - Талдықорған» автожолының бөлігінде БАҚ өкілдері «Нұрлы Жол» мемлекеттік бағдарламасы аясында жүзеге асырылып жатқан жол құрылысының жұмыстарымен танысты.

Өткен жылы республикалық маңызға ие автомобиль жолдары торабын дамытуға 174 миллиард теңге бөлінген болса, оның ішінде 41,2 миллиард теңге Алматы облысының еншісіне бұйырған-ды. Ол жалпы бюджеттің 24 %-ын құрайды. Биылғы жылы жалпы автожол құрылысына Республикалық бюджеттен 234 миллиард теңге бөлініп, оның ішінде Алматы облысының үлесіне 47,8 миллиард теңге шығып отыр. Биылғы жылы 306 шақырым автожол бойында жұмыстар жүргізіледі, 265 шақырым жол қайта қалпына келтіріліп, 41 шақырым жолға орташа жөндеу жұмыстары жүргізілмек. Жыл соңына дейін 98 шақырым жаңартылған жол пайдалануға берілетін болса, ол үшін 946 дана техника мен 1 767 адам жұмысқа тартылып отыр. Сондай-ақ, Дүниежүзілік банктің қарыз беруі арқылы «Алматы-Қорғас» автожолының бөлігінде қайта қалпына келтіру жұмыстары жүріп жатыр. Осы жайында «Арқарлы асуы айқара ашылды» деген мақалада толық берілген.

Бас басылымда «Қатарынан 20 нокаут!» деген мақала көпшілік назарына ұсынылып отыр. Өткен жексенбі күні таңертең қазақстандық кәсіпқой боксшы АҚШ-та өзінің 33-ші жекпе-жегін өткізіп, тағы да мерзімінен бұрын жеңіске жетті. Ол бұл жолы америкалық былғары қолғап шебері кіші Вилли Монромен WBA (Super), IBO және WBC (Interim) нұсқалары бойынша орта салмақтағы әлем чемпионы атағы үшін шайқасты 6-раундта аяқтады. Біздің бағлан осы арқылы атақты Майк Тайсонның тағы бір рекордына өзгеріс енгізді.

Жекпе-жек Американың Калифорния штатындағы Инглвуд қаласының «Форум» спорт аренасында өтті. Геннадий Головкин әдеттегідей ұрыстың басынан алға ұмтылып, қауырт шабуылға көшті. Ол айқастың басында-ақ Монроны теңселтіп жіберетіндей бірнеше жойқын соққылар беріп тастады.

***

«Айқын» газетінің жазуынша, оқулықтардың сапасы үшін оның авторлары, министрлік қызметкерлері, тіпті министрдің өзі дербес жауапкершілік арқалауы қажет. Кеше Парламентте өткен «Үкімет сағатында» Мәжіліс төрағасының орынбасары, «Нұр Отан» партиясы фракциясының жетекшісі Дариға Назарбаева осындай пікір айтты: «Дербес жауапкершіліктің жоқтығы кесірінен оқулық жазуға формальды, бей-жай қарау орын алуда. Нәтижесінде, сапасыз оқулықтарға бюджеттен қаржы босқа шығындалуда. Сондықтан қазір жаңа оқулықтарды ендіруге асықпаған жөн. Бір жылға болса да кейін шегеріп, мұқият қарап, тек сапалы оқулықтарға ғана өмірге жолдама берейік», - деді ол.

Кеше депутаттар алдына «оқулық­тар­дың сапасы және оқулықтармен қам­та­ма­сыз ету» тақырыбында есеп беруге кел­ген Білім және ғылым министрі Аслан Сәрінжіповке депутат Жексенбай Дүй­се­баев қызық бір жұмбақ қойды: «Сіздің оқу­лықтарыңызды қарап, таңғалып отыр­мыз. Мында 1 сынып оқушылары үшін бір жұмбақ жазыпсыздар: «Туған жер­дің күні де ыстық, түні де ыстық» дей­ді. Бұл жұмбақ па, мәтел ме, әлде не? Біз әріп­тестерімізге, бір-бірімізге осы жұм­бақ­ты қойып, шешімін таба алмадық!» Оның жауабын министр де айтпады. Бұл жайында «Ойды - онға, сананы - санға бөлген оқулық» деген мақаладан толық оқи аласыздар.

Осы басылымда «Құнанбай» Астанаға келді» деген мақала жарияланды. Ақын Абайдың, хакім Абайдың әкесі Құнанбай Өскенбайұлының өмірі өзек болған «Құнанбай» тарихи көркем фильмі Астанада көрсетілді. Бұған дейін Құнанбайдың кіндік қаны тамған топырақта - Семей өңірінде тұсауы кесілген фильмді елордамызда алғаш болып БАҚ өкілдері тамашалады. Іле баспасөз мәслихаты өткізілді.

Мәдениет және спорт министрлігінің тапсырысы бойынша Шәкен Айманов атын­дағы «Қазақфильм» АҚ жарыққа шы­ғарған фильмнің режиссері - Қазақ­стан­ның халық артисі, Мемлекеттік сый­лық­тың иегері, қазақ мәдениетінің көр­некті қайраткері Досхан Жолжақсынов. Фильм сценарийін Досхан Жолжақсынов пен арамыздан ерте кеткен жазушы, мә­дениеттанушы Таласбек Әсемқұлов жаз­ған. Тарихи драманың басты рөлін - Дос­хан Жолжақсынов, Зере рөлін - Нұр­сифат Салықова, Абайды - Әліби Сы­рай­лы, Ба­рақ сұлтанды - Айдос Бек­­теміров, Күң­кені - Майра Омар, Ұл­жанды - Қа­ра­гөз Сүлейменова сом­да­ды.

Қасиетті Шыңғыстаудың Ақшоқы қыс­тауында дүниеге келген дала кемеңгері Құ­нанбай Өскенбайұлы өмірінің бір ке­зеңін қамтитын фильмді көрерменнің ә дегенде Мұхтар Әуезовтің «Абай жолы­мен» салыстыратыны заңды. Осы тұста ес­керер жайт, фильм аталған роман же­лі­сіне сүйенбеген.

***

«Ана тілі» газетінің соңғы санында «Мәтін тізбесіне мән беретін кез келді...» деген мақала берілген. Қазіргі жаһандану кезеңінде әртүрлі саяси-әлеуметтік, экономикалық қарым-қатынастарға байланысты ақпарат ағыны бұрын-соңды болмаған қарқынмен өршуде. Ал қоғам өміріндегі мұндай ақпарат ағымының таралуы табиғи тілде жүзеге асатындықтан, тіл білімінің қызметі күннен-күнге кеңеюде. Осыған байланысты ұшы-қиырсыз ақпарат ағынын игеру мақсатында шетел және орыс тіл білімінде орасан зор нәтиже беріп отырған тілдік корпустарды қазақ тіл білімінің материалдары негізінде жасау бүгінде үлкен сұранысқа ие болып отыр.

«Сонымен қазақ тілінің Ұлттық корпусын жасау үшін А.Байтұрсынұлы атындағы Тіл білімі институтында арнайы орталық құрудың қажеттігі мен оның алғышарттарын атап көрсеттік. Ал мұндай ауқымды іске мемлекет тарапынан қолдау көрсетілсе, біртұтас қазақ тілінің Ұлттық корпусын құрастыру ісі алға басатыны сөзсіз. Мұндай Ұлттық құндылықты жасап шығару бүгінгі қазақ тіл білімінің ғана емес, қоғамның болашаққа қояр талаптарының бірі деп білеміз», - деп жазады автор.