Күнбағыс майын шығаратын зауыт салуға мемлекеттен қолдау тоқтатылады

АСТАНА. KAZINFORM –  Елдегі күнбағыс майын шығаратын зауыттар 41 % ғана жүктемемен жұмыс істеп тұрн. Бұл туралы Ауыл шаруашылығы министрлігінің Kazinform сауалына жолдаған жауабында айтылған.

«Тұтастай алғанда, елімізде шикізат бойынша қайта өңдеу қуаты жеткілікті. 2023 жылы күнбағыс қайта өңдеу бойынша жұмыс істеп тұрған қуаттардың жүктемесі 41 %-ын құрады. Осылайша, таяу болашақта жаңа кәсіпорын құруға қолдау шараларын алып тастау жоспарланып отыр», - делінген министрлік жауабында.

Министрліктегілер Қазақстан топырағында өнген өнімнің көбі шикізат күйінде сыртқа кетіп жатқанын мойындап отыр.

«2023 жылдың ақпан айынан бастап күнбағыс экспорты үшін 20 %-ы, бірақ тоннасына кемінде 100 еуро мөлшерінде экспорттық кедендік баж қолданылады. Күнбағысқа экспорттық баж экспортқа шикізаттың көп мөлшерін әкету қаупін болдырмау және отандық өңдеу саласын дамыту мақсатында белгіленген», - деп жазылған жауапта.