Құрбан айт: Қарағандыда құрбандық шалатын орындар анықталды
ҚАРАҒАНДЫ. ҚазАқпарат – Қарағандыда Құрбан айт кезінде мал союға арналған орындар анықталды. Қала бойынша құрбандық шалу үш орында өтеді, деп хабарлайды ҚазАқпарат тілшісі.
Қарағандыда мал союға арналған үш орын анықталды. Олар келесі мекенжайлар бойынша орналасқан:
- Резник көшесі, 18 (ЖК А. Әбішева)
- Гоголь көшесі, 2/23 («Арай KZ» ЖШС)
- С. Сейфуллин көшесі, 53 («Хасенов» ШҚ).
Айта кетсек, биыл Құрбан айттың бірінші күні 28 маусымға келеді, мереке үш күнге созылады.
Сондай-ақ, құрбандықты сайт арқылы онлайн режимде шалуға болады. Қарағандылықтар офлайн және онлайн құрбан шалу туралы толығырақ 8-702-131-03-12 телефоны арқылы біле алады.
«Құрбан айтта біз мұқтаж отбасыларға, сондай-ақ өтініш берген ұйымдарға, мысалы зағиптар қоғамына, қарттар үйлеріне және басқаларға құрбандыққа шалынған малдың етін таратамыз. Сондай-ақ, демеушілердің көмегімен басқа да қайырымдылық акциялары өтеді», - дейді «Зекет және қайырымдылық» қорының Қарағанды облысы бойынша өкілі Мирас Қасымов.
Ал, облыстық санитариялық бақылау департаментінің мамандары Құрбан айт кезінде ережелерді сақтау керектігін еске салды.
«Құрбан айт» мерекесіне арналған іс-шара қарсаңында Қарағанды облысының санитариялық-эпидемиологиялық бақылау департаменті құрбандық шалу үшін жануарларды қолданыстағы талаптарға сәйкес ЖАО-мен келісілген сою алаңдары аумағында союды, құрбандық шалу орындарында үй-жайлар мен іргелес аумақты дезинфекциялауды, мал сою орындарына санитарлық өңдеу жүргізу, санитариялық-эпидемиологиялық талаптарды сақтау, санитариялық-ветеринариялық талаптарды сақтау, мұқтаж адамдарға тез бұзылатын өнімдерді (құрбандық малдарының етін) тасымалдау және сақтау кезінде санитариялық-эпидемиологиялық қағидалардың талаптарын сақтау керектігін ескертеді», - деп жазды Қарағанды облыстық СЭБД әлеуметтік желілердегі хабарламасында.
