Құрылыс инженерлерін сертификаттау қызметі бәсекелестік ортаға беріледі – жаңа кодекс жобасы

АСТАНА. KAZINFORM – Бүгін Парламент Мәжілісінде жаңа Құрылыс кодексінің жобасы мен оған ілеспе заң жобасы таныстырылды.

«Кодекс жобасында цифрландыру мәселелеріне ерекше назар аударылды. Бұл ретте, жобалау алдындағы дайындықтан бастап нысанды пайдалануға беруге дейінгі құрылыстағы қызметтің барлық саласына әсер ететін дербес бағыт ретінде айқындалды. Сонымен, e-Qurylys ақпараттық жүйесінің алаңында құрылыс объектісінің циклінің барлық кезеңдері қарастырылады. Онда негізгі екпін құрылыс кезеңінде қойылады. Мұнымен қоса, дәл осы алаңда тестілеу рәсімі – құрылыс саласының мамандарын сертификаттау және тізілімді автоматты түрде енгізу жүргізіледі», - деді ҚР Өнеркәсіп және құрылыс вице-министрі Тимур Қарағойшин.

Оның айтуынша, цифрландыру жұмысы аясында заңнамалық тұрғыда жобалау жөніндегі жұмыстардың сапа деңгейін арттыруды қамтамасыз етуге тиіс құрылыс обектілерінің ақпараттық модельдеу міндеті бекітілген.

«Сарапшыларды және инженерлік-техникалық қызметкерлерді аттестаттаудың қолданыстағы жүйесі сарапшылардың дәрежесін жеткілікті деңгейде көрсетпейді. Халықаралық тәжірибені қарастырылды. Бұл ретте, ұлттық заңнаманың ерекшелігін ескере отырып, Европа одағының тәжірибесіне сәйкес құрылыс саласының инженерлерін сертификаттауды енгізу жоспарланып отыр. Сертификаттауды жүргізу жөніндегі функция бәсекелестік ортаға беріледі және нарық қатысушылары арқылы жүзеге асырылады. Бұдан басқа, құрылыс саласындағы ережені өрескел бұзған жағдайда, қызметті жүзеге асыруға тыйым салу мүмкіндігімен құрылыс нарығына қатысушылардың ортақ жауапкершілігін белгілеу жоспарланған», - деді вице-министр.