Құрлықтық хоккей лигасы: «Барыс» «Сочи» командасын жеңді
НҰР-СҰЛТАН. ҚазАқпарат - «Барыс» бүгін Құрлықтық хоккей лигасындағы кезекті ойынын елордада «Сочи» командасына қарсы өткізді, деп хабарлайды ҚазАқпарат тілшісі.
Кездесуді қос команда белсенді бастады. Алғашқы сәтте ресейлік клуб хоккейшілері «Барыс» қақпасы маңында жиі бой көрсетті.
Бірінші кезеңнің 4-минутында олардың қатарынан Кирилл Петьков «Сочи» командасын алға шығарды. Одан кейін қазақстандық клубтан Әлихан Әсетов 9, Роман Савченко 14-минуттарда мергендік танытты.
Екінші кезеңде Якоб Лилья 29, 39-минуттарда қос голдың авторы атанды.
Үшінші кезеңде де айдын иелері басымдықты арттырды. Нәтижесінде «Барыс» хоккейшісі Кирилл Савицкий 49-минутта көздеген нысанадан мүлт кеткен жоқ. Ал ресейлік клубтан 59-минутта Янис Якс қорытынды есепті белгіледі.
Осылайша «Барыс» қарсыласынан 5:2 есебімен басым түсті.
Қазір «Барыс» 37 ойыннан кейін 36 ұпаймен турнир кестесінде 20-орыннан 18-орынға көтерілді.
Енді елордалық клуб келесі кездесуін елордада 10 желтоқсанда Қытайдың «Куньлунь Ред Стар» командасына қарсы өткізеді.
Еске салсақ, «Барыс» бұдан бұрын Ресейде «Ак Барс» (Қазан) командасынан басым түсті.
