Құрлықтық хоккей лигасы: «Барыс» «Сочи» командасына есе жіберді
НҰР-СҰЛТАН. ҚазАқпарат - «Барыс» бүгін Құрлықтық хоккей лигасындағы кезекті ойынын Ресейде «Сочи» командасына қарсы өткізді, деп хабарлайды ҚазАқпарат тілшісі.
Кездесу барысында командалар гол соғу мүмкіндігін іздеді. Алдымен айдын иелері қатарынан үш шайба соғып кетті. Ресейлік клубтан Артём Николаев 16, Кирилл Мильниченко 18, Александр Гордин 23-минуттарда мергендік танытты.
Одан кейін қазақстандық клуб хоккейшілері екі шайба соғып, есеп айырмасын қысқартқан еді. Бұл голдар 32, 36-минуттарда Кёртис Валк пен Роман Старченконың еншісіне жазылды.
Келесі кезекте «Сочи» сапынан Никита Камалов 46, Иван Мищенко 54-минуттарда есепті үстемелей түсті.
«Барыс» енді келесі ойынын 18 қарашада Ресейде «Спартак» (Мәскеу) командасына қарсы өткізеді.
Айта кетсек, екі команда бүгінге дейін 14 мәрте шеберлік байқасты. Оның 9-ы «Барыстың» басымдығымен аяқталса, қалғанында ресейлік клубтың мерейі үстем болды.
