Күшіміз – бірлікте: Атыраудан 8 тонна азық-түлік, өзге де заттар Ақтөбе облысына жіберілді

АТЫРАУ. KAZINFORM – Атырау облысының тұрғындары үш күнде 8 тонна азық-түлік, киім мен дәрі-дәрмек жинады. Бүгін гуманитарлық көмек заттары су тасқынынан зардап шеккен Ақтөбе облысына жөнелтілді. 

Атыраудағы Жастар ресурстық орталығының басшысы Мәнсия Сағидоллаеваның айтуынша, гуманитарлық көмек заттары «Күшіміз – бірлікте!» акциясы аясында үш күнде жиналған. 

«Еліміздің біраз өңірі су тасқынынан зардап шекті. Отандастарымыз табиғи апаттың қыспағында қалып, қиналған сәтте қолдау білдіруді жөн көрдік. Сол себептен, «Күшіміз – бірлікте!» акциясы аясында облыстық ішкі саясат басқармасы арнайы штаб құрған болатын. Үш күнде атыраулықтар 8 тонна азық-түлік, киім, гигиеналық заттар мен дәрі-дәрмек жинады. Гуманитарлық көмекті жинауға жергілікті кәсіпкерлер мен белсенді азаматтар, қалалық және облыстық мәслихаттардың депутаттары, тіпті қарапайым тұрғындар үлес қосты», -дейді Мәнсия Сағидоллаева.

Оның айтуына қарағанда, 2 жүк көлігіне тиелген гуманитарлық көмек заттары Ақтөбе облысына жіберілді. 

Еске сала кетелік, бұдан бұрын Атырауда Ойыл өзенінің маңынан 7 шаруа қожалығы қауіпсіз аумаққа көшірілгенін жазған едік.