Күзгі-қысқы аңшылық маусымы басталады: нені есте ұстау қажет

ПЕТРОПАВЛ. KAZINFORM – Солтүстік Қазақстан облысында күзгі-қысқы аңшылық маусымы 30 тамызда ресми түрде ашылады. 

Аңшылық – жай ғана хобби емес, үлкен жауапкершілік пен заңға бағынуды талап ететін әрекет. Бірақ бұл іспен айналысу үшін арнайы құжаттар мен рұқсаттар қажет.

СҚО Табиғи ресурстар және табиғат пайдалануды реттеу басқармасының мәліметінше, әуесқой аңшыда аңшы куәлігі;

жануарлар дүниесін пайдалануға арналған рұқсат;

аңшылық шаруашылығы субъектісінің жолдамасы;

егер атыс қаруы қолданылса – ішкі істер органдарының қаруды сақтау және алып жүруге берген рұқсаты;

жыртқыш құстармен аң ауласа – оларды тіркеу туралы ресми құжаттар болуы қажет. 

Қазіргі уақытта елік, марал еркегін атуға рұқсат бар. Әуесқой аңшылар 30 тамыз – 30 қараша аралығында қаз, үйрек, қасқалдаққа, қыркүйектің 1-інен борсыққа, қыркүйектің бірінші сенбісінен қабанға аңшылыққа шыға алады. Борсықты 15 қарашаға дейін, қабанды 31 желтоқсанға дейін аулауға рұқсат. 

Ал 6 қыркүйек – 30 қараша аралығында кекілікті, 15 қыркүйек пен 30 қараша аралығында қарақұйрықты, жас, ұрғашы тұяқты жануарларды 15 қыркүйек – 31 желтоқсан аралығында және қарсақ, түлкі, қоянды 1 қараша – 15 ақпан аралығында атуға болады. 

Мамандардың айтуынша, аң аулау барысында тек рұқсаттамада көрсетілген жануарларды ғана атуға болады және саны да шектеледі.

Тұяқты жануарларды аулау тек орманшы немесе мемлекеттік инспектордың қатысуымен ғана жүргізілуі тиіс.

Аңшы әр аңшылық күні аяқталған соң немесе орнын ауыстырғанда арнайы белгі қоюы керек. Тұяқтылар бойынша бұл белгі жануарды атып алғаннан кейін бірден қойылады.

Бұған дейін СҚО-да биыл 200 млн теңгеге тұрғындарға қымбат ота жасалғанын жазған едік.