Құжаттар мерзімінің аяқталатыны туралы SMS-хабарлама жолданады
НҰР-СҰЛТАН. ҚазАқпарат – Енді қазақстандықтар жеке немесе жүргізуші куәлігінің қолданылу мерзімінің аяқталуы туралы ұялы телефон нөміріне жолданатын SMS арқылы алдын ала хабардар болады, деп хабарлайды ҚазАқпарат ҚР Ішкі істер министрлігіне сілтеме жасап.
Мақсат - азаматтардың жеке басын куәландыратын құжаттардың қолданылу мерзімінің аяқталуына байланысты әкімшілік құқық бұзушылықтардың алдын алу, яғни айыппұл түріндегі қосымша қаржылық жүктемені азайту.
ҚР Әкімшілік құқық бұзушылық туралы кодексінің 492-бабымен жеке куәлік мерзімі 10 күннен 1 айға дейін өтіп кетсе – ескерту, 1 айдан астам уақытқа - 7 АЕК немесе 21 441 теңге айыппұл қарастырылған.
Енді мобильдік азаматтар базасында тіркелген қазақстандықтар құжаттың қолданылу мерзімі аяқталғанға дейін 30 күн бұрын өздерінің ұялы телефонына SMS-хабарлама алады. Ол үшін электрондық үкімет порталындағы (eGov.kz) жеке кабинетте ұялы телефон нөмірі көрсетілуі керек.
Айта кетейік, бұған дейін «Азаматтарға арналған үкімет» құжаттың жарамдылық мерзімі аяқталғанын күтпей-ақ, жеке куәлікті ертерек ауыстыруға кеңес берген еді.
