Қытай павильоны энергия саласындағы жетістіктерін паш етті

АСТАНА. ҚазАқпарат - ЭКСПО-2017 халықаралық көрмесінде Қытай Халық Республикасының ұлттық күні аталып өтті. Маңызды шараға ҚР Парламенті Мәжілісінің төр­ағасы Нұрлан Нығматулин, ҚХР Бүкіл­қытай­лық халық құрылтайы тұрақты комитеті төраға­сының орынбасары Шэнь Юэюэ, «Астана ЭКСПО-2017» ҰҚ» АҚ Басқарма төрағасы Ахметжан Есімов қатысты.

«Бүгін біз сіздермен ЭКСПО-2017 көрмесінің аясында жүздесіп отырғанымызға өте қуаныштымыз. Ең алдымен осы халықаралық көрмеде Қытай ұлттық күнінің ашылуымен шын жүректен құттықтауға рұқсат етіңіздер. Сонымен бірге біздің шақыруымызды қабыл алып, осы көрмеге белсене қатыс­қандарыңыз үшін шынайы алғы­сымызды білдіреміз. Бұл көрмеге әлемнің 115 елі қатысуда. Олар өздерінің ең үздік ғылыми тех­нология­ларын және мәдениет табыстарын көрсетуде. Нәти­жесінде Астана Қазақстан Президенті айтқандай, XXІ ға­сыр­дың қаласына айналуда», - деді төраға Ахметжан Есімов.

Осы орайда Нұрлан Нығматулин халықаралық көрмеге Қытай мемлекетінің қатысып жатқандығын жоғары баға­лады.  «Осы көрмеге қатысып отырған барлық мемлекеттер болашақта өркендеуі үшін халықтарымыздың қауіпсіздігі және сапалы өмір, инновациялық даму үшін тиімді шешімдер қабылдауда. Соның ішінде біздің тату көршіміз Қытай елінің «Болашақтың энергиясы: жасыл жібек жолы» экспозициясы - осы көрмедегі ең ірі және ең үлкен жұ­мыс­­тардың бірі. Қытай Халық Республикасы жаңар­ты­латын энергия саласында әлем бойынша алдыңғы қатарда екенін біз жақсы білеміз. Сондықтан елдеріңіздің ЭКСПО-2017 көрмесіне қатысуы жаңа технология­лардың дамуына әрі елдеріміздің арасындағы байланысты одан әрі тереңдетуге жол ашатындығы сөзсіз», - деді  Нұрлан Нығматулин.  Со­нымен қатар ол биыл қос мемле­кет арасында диплома­тия­лық қарым-қатынастың орна­ғандығына 25 жыл толғанын атап өтті.

- Биыл қос ел арасындағы дипломатиялық байланысқа 25 жыл толды. Бұл - екі елдің тату көрші, өзара сенімді дос, стратегиялық әріптес ретінде жақын қатынасын көр­сететін мерейлі кезең. Ол, әрине, ең алдымен Қазақстан Президенті Нұрсұлтан Назарбаев пен ҚХА төрағасы Си Цзиньпин арасындағы салиқалы саясаттың жемісі. Соның нәтижесінде елдеріміздің арасындағы қарым-қатынас барлық салада жыл сайын сапалы деңгейге көтеріліп келеді, - деді Мәжіліс төрағасы.

Ал  Бүкілқытайлық халық өкілдерінің жиналысы тұрақты комитеті төрағасының орынбасары Шэнь Юэюэ аталмыш көрме мемлекеттер арасындағы сауда байланы­сының одан әрі жандануына септігін тигізетіндігін атап өтті. «ЭКСПО-2017 көрмесіне қатысу арқылы біз Қазақ­станмен бұдан да тығыз байланыстарды орнатып, екіжақты әріптестікті жаңа деңгейге көтере аламыз деп сенеміз. Ес­теріңізде болса, Қытай Халық Республика­сының төрағасы Си Цзиньпин де осы көрмеге келіп кеткен. Қазақстан Пре­зиденті Нұрсұлтан Назарбаевпен бірге олар Қытай пави­льонында болды. Біз ЭКСПО-2017 көрмесін қолдаймыз», - деп түйіндеді сөзін ол.

Кейін қос мемлекет өкілдері «Нұр Әлем» павильонын тамашалап, Қытай павильонының күніне арналған шоу ұйымдастырылды. Онда вокалдық музыка, би, акробатика және жауынгерлік өнердің әртүрлі көркемдік түрлеріне бай қызықты шоу ұсынылды.

Атап өтерлігі, ЭКСПО ашылуы қарсаңында Нұрсұлтан Назарбаев пен Си Цзиньпин Қытай Халық Республикасының көрме павильонын аралап,  Қазақстан Президенті «Астана ЭКСПО-2017» халықаралық көрмесіне қатысқаны үшін Қытай жағына ризашылығын білдірген болатын.