Қытайдан тағы 217 қазақстандық эвакуацияланды
«Бүгін таңертеңгі 06.05-те Бейжің қаласынан Қазақстанның 217 азаматы жеткізілді. Олардың барлығы қазір арнайы медициналық ұйымға орналастырылып жатыр. Араларында науқас адамдар тіркелген жоқ», - деді Елжан Біртанов.
Еске салайық, кеше, 10 ақпан күні Мемлекет басшысы Қасым-Жомарт Тоқаевтың тапсырмасына сәйкес Қазақстан Үкіметі ҚХР аумағындағы және отанына оралуға тілек білдірген қазақстандықтарды эвакуациялауды жалғастыратыны мәлім етілді.
Қазақстандықтардың алғашқы легі Қытай елінен 2 ақпанда жеткізілген болатын: 83 азаматтың 80-і – студенттер.
Ал 5 ақпанда Қазақстанның 8 азаматы Ухань қаласынан Ресей мен Өзбекстанға эвакуацияланды.
Қазақстан Сыртқы істер министрлігінің 5 ақпандағы мәліметіне сәйкес, ҚХР аумағында еліміздің 780 азаматы жүр. Оның 559-ы – студенттер. Олардың арасында елге жеткізу туралы өтінішті 427 адам берген, қалғандары сонда қалуға ниет білдірген. «Сыртқы саяси ведомство дипломатиялық арналар арқылы азаматтарымызды елге әкетуді ұйымдастыру мүмкіндігін пысықтап жатыр», - деген болатын министрліктен.
Бүгінде коронавирустың жаңа түрі өршіген Қытайда індетке шалдыққандар саны 43 мыңға жуықтады, 1 мыңнан астам адам көз жұмды. 3996 адам сауығып, ауруханадан шығарылды.