Қыздар университеті 9 га жер учаскесін заңсыз иеліктен шығарған
НҰР-СҰЛТАН. ҚазАқпарат – Қазақ ұлттық қыздар педагогикалық университеті 9 га жер учаскесін заңсыз иеліктен шығарған. Бұл жайында Мәжіліс депутаттарының сауалына Білім және ғылым министрі Асхат Аймағамбетовтің жауабында айтылған, деп хабарлайды ҚазАқпарат тілшісі.
«Министрлік 2020 жылғы желтоқсанда Қазақ ұлттық қыздар педагогикалық университетінде ішкі аудит жүргізу барысында Алматы қаласының жанындағы Кемертоған кентінде орналасқан, ЖОО-ға тиесілі алаңы 9 га жер учаскесін заңсыз иеліктен шығару фактісін анықтады. Бұл ретте жоғары оқу орындары жер телімдеріне қатысты шешімдерді Білім және ғылым министрлігінің келісімінсіз өз бетінше қабылдаған», - деді ол.
Оның атап өтуінше, аталған факті бойынша материалдар құқық қорғау органдарына тапсырылды.
«Сондай-ақ, 2020 жылы «Қ.И.Сәтбаев атындағы Қазақ ұлттық техникалық зерттеу университеті» КеАҚ пен «Семей қаласының Шәкәрім атындағы университеті» КеАҚ-та да тексеру жүргізілді. Тексеру нәтижесі бойынша жылжымайтын мүлік объектілерін заңсыз иеліктен шығару фактілері анықталған жоқ», - деді Асхат Аймағамбетов.
