Қызылағаштағы су тасқынына қатысты қылмыстық істер әскери сотқа тапсырылды

ТАЛДЫҚОРҒАН. Тамыздың 24-і. ҚазАқпарат /Сандуғаш Дүйсенова/ - «Қызылағаш» су тұтынушылар ауылдық су тұтыну кооперативі мен «Шынар» ЖШС-дағы басқару функцияларын атқарған бірқатар тұлғаларға қатысты алдын ала тергеу жұмыстары аяқталып, қылмыстық істер Талдықорған гарнизонының әскери сотына тапсырылды, деп хабарлады сейсенбі, тамыздың 24-і күні Алматы облысы прокурорының бірінші орынбасары Қыдырәлі Оспанов.

Естеріңізге сала кетейік, олар Қызылағаш су қоймасында наурыздың 11-інен 12-сіне қараған түні орын алған қайғылы оқиғаға қатысты тұтқындалған болатын.

Тексеру барысында Қызылағаш ауылдық округінің әкімі Е.Жүнісовке, Ақсу ауданы Төтенше жағдайлар бөлімінің бастығы К.Байзақовқа, Ақсу ауданы әкімінің орынбасары Б.Тынышбаевқа қылмыстық кодекстің 316 бабы (жұмысқа немқұрайлы қарау) бойынша айып тағылды.

«Қызылағаш» су тұтыну кооперативі басқармасының төрағасы К.Бекеев пен кооперативтің атқарушы директоры М.Жүнісов Қылмыстық кодекстің 232 бабы бойынша (міндетіне қиянат жасау) кінәланып отыр. Алматы облысы бойынша ТЖД бастығының орынбасары Е.Енинге қылмыстық кодекстің 318 бабы, 2 тармағы бойынша кінә тағылды. Көрсетілген тұлғалардың барлығына тұтқындау шарасы қолданылатын болады.

1998 жылы облыс әкімі су ресурстары жөніндегі комитетінің төрағасы болған, Қызылағаш су қоймасын заңсыз түрде К.Бекеевке тапсырған Алматы облысы әкімі су ресурстары комитетінің бұрынғы төрағасы А.Сабыровқа қатысты қылмыстық кодекстің 308 бабы, 3 тармағы бойынша іс қозғалады. Одан ешқайда шықпау туралы қолхат алынды, деп хабарлайды Қ.Оспанов.