Қызылорда облысында қант диабетіне шалдыққан жастар саны артып отыр
ҚЫЗЫЛОРДА. ҚазАқпарат - Қызылорда облысында қант диабетіне шалдыққан жастар саны артып отыр, деп хабарлайды ҚазАқпарат тілшісі.
Облыста қант диабетімен ауырғандар саны өткен жылмен салыстырғанда 2,6 пайызға өскен. Олардың қатарында жастар саны басым.
Әлемде 2 типті қант диабетімен ауыратын науқастардың саны көбейген. Дүниежүзінде аталған сырқатқа шалдыққан 400 миллионға жуық адам бар.
«Қант диабеті жүрек-қан тамыр ауруларынан кейінгі екінші орында тұр. Бүгінде ауруға шалдыққан науқастардың жалпы саны - 14 700 құрайды. Бұл өткен жылмен салыстырғанда 2,6 пайызға көп. 2011 жылдан бастап қант диабетін анықтау үшін скрининг жүргізіліп, барлық емханалар осы бағдарламамен жұмыс істеуде», - деді облыстық денсаулық сақтау басқармасының штаттан тыс эндокринолог дәрігері Гүлнар Оразова.
Қант диабеті әсер ете алатын және әсер ете алмайтын болып екіге бөлінеді. Біз әсер ете алмайтын факторлардың бірі – адамның жасы.
«Адамның жасы ұлғайған сайын қант диабетіне шалдығу ықтималдығы жоғары. Екінші фактор – бұл тұқым қуалаушылық. Яғни сырқат адамға ген арқылы беріледі. Сондай-ақ, қимыл қозғалыстың аз болуы, дұрыс тамақтанбау, зиянды әдеттердің барлығы қант диабеті ауруына әкеп соқтыруы мүмкін», - деді №6 қалалық емхананың эндокринолог дәрігері Гүлжан Абсатова.
