Қызылорда облысында шыны зауытының құрылысы биыл аяқталады
ҚЫЗЫЛОРДА. ҚазАқпарат - Қызылорда облысында шыны зауытының құрылысы биыл аяқталады, деп хабарлайды ҚазАқпарат тілшісі.
Өңірде индустрияландыру бағдарламасы аясында құны 543 млрд. теңгені құрайтын 46 жоба жүзеге асырылуда. Нәтижесінде 7 мыңнан астам жұмыс орны құрылады. Былтыр 5 жоба іске қосылды. 10 жоба құрылыс индустриясы саласына бағытталған.
«Ірі стратегиялық жобамыздың бірі – шыны зауытының құрылысы биыл аяқталады. Кәсіпорынның аясында бірнеше ілеспе кәсіпорындар құру бойынша жұмыстар басталды. Қазір 2 ілеспе жоба - шыны талшықтары мен композиттік материалдар және айна өндірісі бойынша жобалау жұмыстары жүргізілуде. Құрылыс индустриясы саласында алдағы уақытта керамзит, арматура, 2 асфальтбетон шығаратын зауыттары ашылып, құрғақ құрылыс қоспаларын өндіретін цех кеңейтіледі», - деді облыстық индустриялық-инновациялық даму басқармасының басшысы Ринат Сұлтангереев.
Өңірдің ерекшелігіне сәйкес 46 жобаның ішінде агроөнеркәсіп саласындағы жобалардың 26-ның үлесі басым. Оның ішінде, 3 жоба былтырғы жылы іске қосылды. Олар Арал ауданында екі балық өңдеу цехы, Жалағаш ауданында тыңайтқыштар шығаратын «Агрохим Сервис» серіктестігі. Биыл осы салада тағы 2 жоба іске қосылмақ.
