Қызылорда облысында соңғы бес жылда сәбилердің өлім-жітімі 23 пайызға төмендеді
Бұл туралы облыстық денсаулық сақтау басқармасының бастығы Серік Игембаев бұқаралық ақпарат құралдарымен өткен баспасөз мәслихатында айтты.
Жалпы Қызылода облысындағы өткен жылғы медициналық-демографиялық жағдай оң бағалануда. Халықтың орташа табиғи өсімі 21,65 пайыз (республикада бұл көрсеткіш 13,94 пайыз) деңгейінде, туу көрсеткіші - 28,36 пайыз (республикада 22,76) және өлім-жітім 5,4 пайызды (республикада 8,82) құрады. Сондай-ақ, аймақтың бас дәрігері ана өлімі көрсеткішінің 100 мың тірі туылған нәрестеге шаққанда бес жылда 70 пайызға төмендегенін айтты. Есепті мерзімде үш ана өлімі орын алды. Сәбилердің өлім-жітімі соңғы 5 жылда 23 пайызға төмендеді. Бұл нәтижелердің барлығына салада мемлекеттік бағдарламалар негізінде атқарылып жатқан ауқымды жұмыстардың арқасында қол жеткізіліп отыр.
2008 жылдан бері түрлі деңгейдегі 68 медициналық кешеннің құрылысы жүргізілген. Оның ішінде былтыр республикалық бюджет қаражаты есебінен «100 мектеп, 100 аурухана» бағдарламасы бойынша Қызылорда қаласында ауысымына 500 адам қабылдайтын емхана құрылысы аяқталып, іске қосылса, жергілікті бюджет қаражатынан 12 фельдшерлік акушерлік пункт салынды. Ал «Сәби қоры» жекеменшік қайырымдылық қоры қалалық сәбилер үйіне 60 төсектік жаңа ғимаратты сыйлады. Облыста жылжымалы медициналық кешен тұрғындарға қызмет көрсетуде. «350 дәрігерлік амбулатория, фельдшерлік-акушерлік пункт пен емхана» бағдарламасы аясында бірқатар емдеу, алдын алу мекемелерінің құрылысы қолға алынды.
Облыстың денсаулық сақтау басқармасына қарасты медициналық ұйымдардағы жоғары білімді мамандарға тапшылық 2011 жылмен салыстырғанда азайды, әсіресе ауылдық жерлердегі дәрігер мамандарына қажеттілік соңғы үш жылда 52,3 пайыздан 37,8 пайызға төмендеген. 2009-2012 жылдары аудандық, ауылдық емдеу, алдын алу ұйымдарына жалпы 150-ден аса жас маман-дәрігер жұмысқа қабылданған.