Қызылордада 16 адам коронавирусты қарым-қатынас арқылы жұқтырған
ҚЫЗЫЛОРДА. ҚазАқпарат - Қызылорда облысында бүгін, 27 наурызда, коронавирусқа шалдыққан науқастардың басым бөлігі қарым-қатынас арқылы жұқтырғаны анықталды, деп хабарлайды ҚазАқпарат тілшісі.
Айта кетейік, 27 наурызда өңірде 24 адам коронавирус инфекциясын жұқтырған. Олардың 20-сы Қызылорда қаласында тұратын болса, аудандар бойынша Қармақшыда - 1, Аралда - 3 дерек тіркелген.
«Коронавирус жұқтырған науқастардың 8-інде аурудың клиникалық белгісі байқалса, қалғанында ол симптомсыз болып отыр. Айта кетерлігі, 16 адам да коронавирус инфекциясымен ауырған науқастармен қарым-қатынаста болған. Ал 2 адамнан профилактикалық тексеру барысында, 6-ауынан эпидемиологиялық көрсеткіш бойынша ПТР тестілеу кезінде анықталды», - деп мәлім етті Қызылорда облысы санитарлық-эпидемиологиялық бақылау департаментінің баспасөз қызметінен.
Естеріңізге сала кетелік, өңірде 3983 адамнан коронавирус анықталған. Оның ішінде 3885 адам дертінен айықты.
Бұдан бұрын Қызылордада карантин талабын сақтамаған 6 отбасылық той тоқтатылған болатын.
