Қызылордада 5 жасар бала көпқабатты үйдің терезесінен құлап кетті
ҚЫЗЫЛОРДА. ҚазАқпарат - Қызылордада көпқабатты тұрғын үйден бес жастағы қыз бала құлап, жарақат алды, деп хабарлайды ҚазАқпарат тілшісі.
Аталған оқиға 17 мамыр күні Қызылорда қаласындағы «Астана» мөлтек ауданында орын алған. Сол сәтте ол үйде ата-ананың қарауынсыз қалған.
«Соңғы уақытта облыста балалардың терезеден құлау оқиғасы жиі кездеседі. Биыл мұндай оқиға екінші мәрте тіркеліп отыр. Қазіргі таңда баланың жағдайы орташа. Облыстық балалар ауруханасында дәрігерлер бақылауында», - деп мәлім етті Қызылорда облыстық өрт сөндіру және авариялық құтқару қызметінің баспасөз маманы Әлия Ережепова.
Ал, 2019 жылы 7 бала осындай жағдайға тап болып, оның ішінде бір бала оқиға орнында қаза тапқан. Зардап шеккендердің негізгі бөлігі - 1-6 жас аралығындағы балалар.
Бұдан бұрын Қызылордада екі жастағы сәби үшінші қабаттан құлап кетті.
