Қызылордада атыс қарулары жасырылған орын анықталды

ҚЫЗЫЛОРДА. ҚазАқпарат - Қызылорда облысында далалық жерден түрлі атыс қарулары жасырылған орын анықталды, деп хабарлайды ҚазАқпарат тілшісі.

Аталған орын ҚР Ішкі істер министрлігі және Қызылорда облысы Полиция департаментінің қызметкерлерінің бірлескен жедел іс-шарасы барысында белгілі болды.

«Полиция қызметкерлері далалық жерден түрлі атыс қарулары жасырылған орынды анықтады. Ол жерден шолақ мылтық, тапанша, оқтар, асхана пышағы, каска, резеңке таяқ (дубинка), темір қол кісені және арнайы киім алынды. Бұл дерек бойынша сотқа дейінгі тергеп-тексеру әрекеті басталды. Тексеру жұмыстары жүргізіліп жатыр», - деп мәлім етті Қызылорда облыстық Полиция департаментінен.

Еске салсақ, Қызылордада алаяқтық қылмысының басым бөлігі интернет арқылы жасалған.

Фото: Қызылорда облысы Полиция департаменті