Қызылордада бала күтуші 3 млн теңгенің зергерлік бұйымдарын ұрлап кетті
ҚЫЗЫЛОРДА. ҚазАқпарат – Қызылорда қаласында бала күтуші құны үш миллион теңгеден асатын зергерлік бұйымдарын ұрлап кетті, деп хабарлайды ҚазАқпарат тілшісі.
Полицияға үй иесі зергерлік бұйымдарын ұрлағаны жөнінде арызданды.
«Сол үйдегі шкаф ішінен құны үш миллион теңгеден асатын қымбат зергерлік бұйымдар ұрланған. Жедел-іздестіру шаралары жүргізілді. Нәтижесінде ұрлық жасаған сол үйде жұмыс істейтін бала күтуші екені анықталды. Бұл бойынша ҚР Қылмыстық кодексінің 188-бабының 3-бөлігімен (Ұрлық) сотқа дейінгі тергеп-тексеру амалдары жүргізілуде. Оқиғаның мән-жайлары анықталуда», - деп мәлім етті Қызылорда облыстық полиция департаментінен.
