Қызылордада достарымен балық аулауға шыққан 55 жастағы азамат суға батып кетті

ҚЫЗЫЛОРДА. ҚазАқпарат - Қызылорда облысында балық аулауға шыққан 55 жастағы адам кіші Арал теңізіне суға батып кетті, деп хабарлайды ҚазАқпарат тілшісі.

Оқиға Арал ауданы Мергенсай ауылы аумағындағы теңіз аумағында болды. Достарымен балық аулауға шыққан азаматтың пластмасса қайығы аударылып көз жұмды.

«Өрт сөндіру және авариялық құтқару жұмыстары қызметінің өкілдері оқиға орнына 4 құтқарушы 1 техника, 1 моторлы қайықпен барды. Оның денесі бүгін, 17 тамызда сағат 10.45-те табылды», - деп мәлім етті Қызылорда облыстық Төтенше жағдайлар департаменті өрт сөндіру және авариялық-құтқару жұмыстары қызметінің өкілдері.

Естеріңізге сала кетелік, Қызылорда облысында жыл басынан бері 31 адам суға кетті. Оның ішінде 11-і бала.

Бұдан бұрын Сырдарияға батып кеткен екі баланың мәйіті табылды.