Қызылордада каналға суға батып кеткен ер адам мен жасөспірімнің денесі іздестірілуде

ҚЫЗЫЛОРДА. ҚазАқпарат - Қызылорда облысында каналға суға батып кеткен 33 жастағы ер азамат пен 13 жастағы жасөспірімнің денелері бір күннен бері іздестіріліп жатыр, деп хабарлайды ҚазАқпарат тілшісі.

Оқиға Жаңақорған ауданына қарасты Көктөбе ауылы аумағындағы Келінтөбе каналында 27 маусымда сағат 14:12 шамасында болған. Шымкент қаласында тұратын 1988 жылғы ер азамат пен 2008 жылғы жасөспірім суға батып кеткен.

«Оқиға орнына жедел құтқару жасағынан 6 құтқарушы 1 техника, 1 үрлемелі қайық, 3 жинақ сүңгуір жабдығымен барды. Мамандар сағат 18.34-те іздестіру жұмыстарын бастады. Оған қоса моторлы қайықпен су бетінде іздестіру жүргізілді. Оған барлығы 13 адам қатысты», - деп мәлім етті облыстық төтенше жағдайлар департаменті өрт сөндіру және авариялық құтқару жұмыстары қызметінен.

Ведомство мәліметінше, іздестіру бүгін де жалғасуда. Мамандар 6.00-ден бастап іздеу шарасына қайта кірісті.

Еске салсақ, бұдан бұрын Қызылордада 8 жасар ұл бала суға батып кетті.