Қызылордада қаңтар оқиғасы кезінде мәйітханадан 6 адамның денесі ұрланған
ҚЫЗЫЛОРДА. ҚазАқпарат - Қаңтар оқиғасы кезінде Қызылордада мәйітханадан тәртіпсіздікке қатысқан 6 адамның мәйіті ұрланған, деп хабарлайды ҚазАқпарат тілшісі.
Бұл жөнінде облыстық полиция департаменті таратқан қаңтардағы жаппай тәртіпсіздік кезінде Қызылордада болған жағдай жөніндегі бейнежазбада айтылды.
«Қаңтар айының 5-6 күндері Қызылорда қаласында болған жаппай тәртіпсіздік барысында мемлекеттік мекемелердің 17 обьектісіне залал келіп, жеке сектордың 21 субьектісі тоналды. Сондай-ақ, 65 көлік құралы өртеніп, 80 көлікке залал келді. Екі автокөлік ұрланған. Қақтығыс барысында 58 полиция қызметкері мен 52 сарбаз түрлі жарақат алды. Облыстық медициналық орталықтың мәйітханасынан тәртіпсіздікке қатысқан 6 адамның мәйіті ұрланды», - деп мәлім етті Қызылорда облыстық полиция департаментінен.
Еске салсақ, бұдан бұрын Қызылорда полицейлері Гүлшара Әбдіқалықованы бұзақылардан қалай қорғап қалғаны жөнінде хабарланды.
