Қызылордада көлік ұрлаған 27 жастағы тұрғын қолға түсті
Қызылорда қалалық полиция басқармасының 102 арнасына 71 жастағы қала тұрғыны қоңырау шалды.
Онда көпқабатты үйдің ауласында тұрған «Сhevrolet Nexia» көлігінің ұрланғаны айтылған.
Келген материалдық шығын - 3,8 миллион теңге.
«Бұл бойынша барлық криминалды полиция бөлімінің қызметкерлеріне ұрланған автокөлік бойынша бағыт-бағдар берілді. Қызылорда қалалық полиция басқармасы қызметкерлері қала аумағында орналасқан мектептің жанынан мемлекеттік белгісі жоқ күдікті көлікті тоқтатқан еді. Тексеру барысында бұл әлгі ұрланған «Сhevrolet Nexia» көлігі екені анықталды. Күдікті ретінде облыстың 27 жастағы тұрғыны ұсталды», - деп мәлім етті Қызылорда қалалық полиция басқармасынан.
Ведомство мәліметінше, бұған қатысты ҚР Қылмыстық кодексінің 200-бабының 1-бөлігі бойынша сотқа дейінгі тергеу басталды.
Онда автомобильдi немесе өзге де көлiк құралын жымқыру мақсатынсыз құқыққа сыйымсыз иеленіп алу жағдайы көрсетілген.
Еске салсақ, бұдан бұрын Қызылордада зейнеткерге қарақшылық шабуыл жасаған екі адам ұсталды.