Қызылордада көпқабатты үйден өрт шығып, 6 адам ауруханаға жеткізілді

ҚЫЗЫЛОРДА. ҚазАқпарат - Бүгін Қызылорда қаласындағы «Шұғыла» мөлтек ауданындағы бес қабатты үйде шыққан өрттен барлығы 17 адам құтқарылды, деп хабарлайды ҚазАқпарат тілшісі.

Оқыс оқиға сағат 11.15 шамасында болды. Облыс орталығындағы «Шұғыла» мөлтек ауданы 7 «А» үйдегі үшінші қабаттан өрт шықты. Ас бөлмесінен басталған жалыннан қысқа толқынды пеш, тоңазытқыш, кір жуғыш машина өртенді. Көпқабатты үйдегі өзге тұрғындар қауіпсіздігін сақтау мақсатында оларды құтқару жұмыстары жүзеге асты.

«Құтқарушылар 7 адам автосаты арқылы эвакуацияланды. Оның ішінде 2-і - бала. Ал өрт автосатысы арқылы 4 қабаттан 10 адам, оның ішінде 5 бала құтқарылды. Өрт 11.34-те сөндірілді. Апаттар медицинасы орталығының бригадасы облыстық медициналық орталыққа көмірқышқыл газынан улану белгісімен 4 адамды жеткізді. Ал «Жедел жәрдем» бригадасы 2 баланы облыстық балалар ауруханасына алып барды. Қаза болғандар жоқ. Оқиға орнында облыстық төтенше жағдайлар департаментінен 14 қызметкер 4 техникамен барды», - деп мәлім етті облыстық төтенше жағдайлар департаменті баспасөз қызметінің жетекшісі Айгүл Нұрманова.

Сондай-ақ, оқиға орнында «Апаттар медицинасы орталығы», жедел жәрдем қызметі, полиция департаментін және өзгеде сала мамандары жетіп қызмет атқарды.

Бұдан бұрын Қызылордада көпқабатты үйден өрт шығып, 50 адам эвакуацияланды.