Қызылордада он жастағы ер бала суға батып кетті

ҚЫЗЫЛОРДА. ҚазАқпарат - Қызылордада он жастағы ер бала каналға суға батып кетті, деп хабарлайды ҚазАқпарат тілшісі.

Оқиға кеше, 24 мамырда сағат 18:12 шамасында болды. Облыс орталығындағы С. Асфандияров көшесінің аяқ тұсындағы каналға 2011 жылы дүниеге келген бала суға батып кетті.

«Аталған аумақта суға түсуге рұқсат етілмеген. Баланың денесін атасы судан шығарып алған. Оқиға орнына облыстық өрт сөндіру және авариялық құтқару жұмыстары қызметінің 6 қызметкері мен 2 техникасы барды», - деп мәлім етті аталған қызметтің баспасөз қызметінен.

Еске салсақ, Қызылорда трассасында 5 адам мінген көлік каналға құлап кетті.

Бес адам мінген «Skoda» көлігі «Қызылорда-Жезқазған» трассасы бойындағы каналға құлап кеткен. Бір адам көз жұмды.