Қызылордада полицейлер ірі көлемде есірткі затын тәркіледі

ҚЫЗЫЛОРДА. ҚазАқпарат - Қызылордалық полицейлер ірі көлемде есірткі затын тәркіледі, - деп хабарлайды ҚазАқпарат тілшісі.

«Қызылорда облысы Полиция департаментінің патрульдік полиция ротасының қызметкерлері «Самара-Шымкент» тасжолының бойында Байқоңыр қаласынан Арал ауданына қарай бағыт алған «Ваз-2114» маркалы автокөлігін жол ережесін бұзғаны үшін тоқтатқан еді. Тексеру барысында көліктің артқы орындығындағы сөмкенің ішінен полиэтилен пакетіне оралған ерекше иісі бар, шөп тәріздес зат анықталды», - деп мәлім етті Қызылорда облыстық полиция департаментінен.

Ведомство мәліметінше, сараптама қорытындысына сәйкес тәркіленген зат жалпы салмағы жарты келіден астам кептірілген марихуана болып шықты. Аталған дерек бойынша ҚР Қылмыстық кодексінің 296-бабы 2-бөлігімен сотқа дейінгі тергеп-тексеру амалдары жүргізілуде. Полицейлер оқиғаның мән-жайын анықтауда.