Қызылордада Жаңа жыл қарсаңында 60 пәтерлі тұрғын үй пайдалануға берілді
ҚЫЗЫЛОРДА. ҚазАқпарат - Қызылордада Жаңа жыл қарсаңында пайдалануға берілген 60 пәтерлі тұрғын үйден бюджеттік ұйым қызметкерлері, кезекте тұрғандар мен көпбалалы отбасылар пәтер кілтін алды, деп хабарлайды ҚазАқпарат тілшісі.
Облыс әкімі Қырымбек Көшербаев жаңа пәтер иелерін келе жатқан жаңа жылмен құттықтады. Соңғы жылдары аймақта көптеген әлеуметтік және бизнес-нысандар, тұрғынүйлер мен өнеркәсіп орны салынғанын атап өтті.
«Тек осы жылдың өзінде қаржыландырудың барлық көзі есебінен облыс орталығында 402 мың шаршы метрге жуық тұрғын үй ел игілігіне айналды. Бүгінгі күні қалада 2052 пәтерге арналған 46 көпқабатты үй, оның ішінде 1272 пәтерге арналған 31 үй - жеке инвесторлар есебінен салынуда. Қуаныштарыңыз құтты болсын», - деді аймақ басшысы.
Жаңа үйдің кілтін алған Батыр ана Бибіайым Әлібекова облыс әкіміне ризашылығын жеткізді.
Айта кетейік, 60 пәтерлі үйдің жалпы ауданы-4 085 шаршы метрді құрайды.
