Қызылордалық полицейлер 11 пәтер ұрлығына қатысы бар бойжеткенді қолға түсірді
ҚЫЗЫЛОРДА. ҚазАқпарат - Биыл 26 қаңтарда Қызылорда қаласының тұрғыны Арай мөлтек ауданы аумағындағы үйіне белгісіз біреулер ешкім жоқ кезде кіріп, алтын, күміс бұйымдарын, «Asus» үлгісіндегі ноутбугын, Nokia маркалы ұялы телефонын ұрлап кеткендігін хабарлаған. Нәтижесінде үй егелеріне 325 000 теңге көлемінде шығын келтірілген. Ұйымдастырылған жедел-іздестіру шаралары барысында полиция қызметкерлері облыс орталығының 23 жастағы азаматшасын ұстады. Бұл туралы ҚазАқпарат ХАА тілшісі облыстық ІІД-ге сілтеме жасап хабарлады.
Тергеу жұмыстары барысында күдіктінің 10 пәтер ұрлығына қатысы бары анықталған. 23 жастағы азаматша барлық пәтер ұрлығы қылмыстарын бір жүйемен іске асырған. Пластик терезелері бар тәуір үйлерді таңдап, ол үйлерде үй қожайындары жоқ екендігіне көз жеткізіп, терезені бұзып кіріп, алтын бұйымдарды, ақша, ұялы телефондар мен ноутбуктарды қолды етіп отырған. Негізінен барлық ұрлық қылмыстары күндізгі уақыттарда, яғни сағат 09.00-ден 18.00 аралығында орын алған. Жәбірленушілерге келтірілген жалпы шығын көлемі 2 млн. теңгеге жуықтап отыр.
Қазіргі таңда ҚР Қылмыстық кодексінің 188-бабы 2-бөлігі (Ұрлық) негізінде қылмыстық іс қозғалып, сотқа дейінгі тергеп-тексеру амалдары жүргізілуде. Айғақты заттар алынып, ұсталған азаматшаның тағы осындай фактілерге қатыстылығы анықталу үстінде.
