Қызылордалық полицейлер есірткі затын заңсыз сақтаған 2 азаматты қолға түсірді
ҚЫЗЫЛОРДА. ҚазАқпарат - Ақпан айының 6-10 күндері өткізіліп жатқан «Транзит» жедел профилактикалық іс-шарасы барысында қызылордалық полицейлер есірткі затын заңсыз сақтаудың, сатудың 2 дерегін анықтады, - деп хабарлады ҚазАқпарат ХАА тілшісі облыстық ІІД-ге сілтеме жасап.
Оқиға 2017 жылдың 7 ақпанында сағат 18.00 шамасында орын алған. ҚР ІІМ-нің Байқоңыр қаласындағы өкілдігінің қызметкерлері жүріс-тұрысы күдік тудырарлық 1967 жылы туған Төретам кентінің тұрғынын тоқтатып, тексеру барысында күртешесінің қалтасынан ақ қағазға оралған жасыл түсті, ерекше иісі бар затты анықтайды. Тиісті тексеру жұмыстары жүргізіліп, белгісіз затқа сараптама тағайындалды. Сараптама қорытындысы бойынша салмағы 1,59 гр.-ды құрайтын «марихуана» есірткі заты екендігі анықталды. Аталған дерек бойынша ҚР Қылмыстық кодексінің 296-бабы 2-бөлігімен қылмыстық іс қозғалды.
Дәл осындай дерек Жаңақорған ауданында да тіркелді. 2017 жылғы 7 ақпанда Жаңақорған аудандық ішкі істер бөлімінің қызметкерлері салмағы 49,48 гр.-ды құрайтын «марихуана» есірткі затын 10000 теңгеге сатпақ болған 1974 жылы туған азаматты ұстады. Сонымен қатар, тексеру шаралары барысында аталған азаматтың үйіне тінту жүргізіліп, 2 газет қиындысына оралған жасыл түсті, ерекше иісі бар затты анықтады. Сараптама тағайындалып, қорытындысы бойынша ол 0,13 гр. «марихуана» екендігі белгіленді.
Ұсталған азамат уақытша ұстау изоляторына қамаққа алынып, оған қатысты Қазақстан Республикасы Қылмыстық кодексінің 296-бабы 2-бөлігі және 297-баптың 1-бөлігі бойынша қылмыстық іс қозғалып, сотқа дейінгі тергеп-тексеру жұмыстары жүргізілуде.
