Қызылорданың «Арзан» базарында шиеліліктер жәрмеңке өткізді

ҚЫЗЫЛОРДА. Шілденің 13-і. ҚазАқпарат /Руслан Игілік/ - Қызылорда қаласындағы «Ар­зан» базарында Шиелі ауданының ауыл шаруашы­лығы өнімдері жәр­меңкесі өткізілді.
None
None

Егінші өңірдің еңбеккерлері бұл жолы құны 2 млн. 708 мың теңгені құрайтын азық-түлік өнімдерін әкелді. Базар нарқынан төмен бағада сатылған өнімдерді алушылар қатары көп болды. Мәселен, «Арзан» база­рында сиыр еті - 750 теңге, қызанақ - 150 теңге болса, Шиелі жәрмең­кесін ұйымдастырушылар сиыр етін 600 теңгеге, қызанақты 120 теңгеге сатып, жергілікті тұрғындардың ризашылығына бөленді.

Шиелі аудандық ауыл шаруа­шылығы бөлімі бастығының орын­басары Тілеубек Бабасов бізбен әңгімесінде биыл аудан бойынша 8300 гектар жерге күріш орналас­тырылғанын және диқандардың судан тапшылық көрмейтінін атады. Сондай-ақ, жанар-жағармай мен техника саны да жеткілікті екен. Бұрынғы күріш егілген алқаптарды қайта өңдеу ісі тиянақты атқа­рылыпты.

Бұл өңір диқандарының ерте көктемнен егетін дақылдарының бірі - қарбыз. Баптай білмесең күтімі кететін осы өнімді егудің тәсілі бар көрінеді.

- Мен өз тәжірибемде егіс алқабындағы қарбыздың бетіне пленка жабамын. Бұл әдіс оны біріншіден зиянкестерден қорғайды және екіншіден ерте пісуіне көп септігін тигізеді, - дейді жәрмеңкеге қатысушы Жиделіарық ауылдық округінің тұрғыны Омархан Жүсіпов.

Соңғы жаңалықтар