Қызылша ауруынан қалай сақтануға болады
- Қызылша қандай ауру түріне жатады? Оның салдары қандай болады?
- Ол қызба, интоксикация, дақты-папулалы бөртпе, энантема, конъюнктива және жоғарғы тыныс жолдарының зақымдалуымен сипатталады. Жедел вирустық инфекциялық ауру адамнан адамға жөтелгенде, түшкіргенде, сөйлескенде ауа тамшылары арқылы жұғады. Сырқат адаммен қысқа уақыт қарым-қатынаста болған жағдайда да екпе алмаған адамдардың оны жұқтыру қаупі өте жоғары.
Айта кетсек, ол пневмония, бронхит, энцефалит сияқты асқынулармен қауіпті. Медициналық көмекке кеш жүгінгенде және қызылшамен қатар басқа аурулар болған жағдайда бұл асқынулар өлімге әкелуі мүмкін. Катаральды құбылыстармен (қызба, бас ауруы, әлсіздік) аурудың алғашқы белгілері және бөртпе пайда болған кезде дәрігермен кеңесіп, оның барлық ұсынымдарын орындау керек.
- Қызылша ауруының белгілері қандай? Оның алдын алу үшін не істеу керек?
- Ол бастапқы кезеңде суық тию сияқты көрінуі мүмкін. Сондықтан дәрігерге уақтылы барған жөн. Жіті респираторлық аурулардың белгісі бар балаларды мектепке дейінгі ұйымдар мен мектепке жібермеу керек.
Ауру адаммен байланыста немесе қасында болғаннан кейін он күннен соң суық тию белгілері сияқты басталады. Атап айтқанда, белгілері ретінде дене қызуы, тұмау, көздің қабынуы және жөтелді айтуға болады. Ауру уақыт өткен сайын асқына түседі. Ауыз іші қабынып, ісініп, іш өтуі мүмкін. Ал 2 немесе 3 күннен кейін ауыздың шырышты қабығында тұздың жартысындай кішкентай ақ дақтар көріне бастайды. Одан кейін 2 немесе 3 күн өткен соң құлақта және мойында, сосын бетте және денеде, ең соңында қол мен аяқта бөртпелер пайда болады. Денеге бөртпелер шыққаннан кейін баланың жағдайы әдетте жақсарады. Ол 5 күннің ішінде шығып болады.
Қызылшадан ең тиімді қорғану жолы - уақтылы вакцинация. Ол Ұлттық екпелер күнтізбесіне енгізілген, тегін жүргізіледі. Балаларға қызылшаға қарсы алғашқы егу 1 жасында және қайта егу (ревакцинация) 6 жасында жасалады. Індеттік көрсеткішке сәйкес вакцинация науқаспен байланыста болған 30 жасқа дейінгі егілмеген (егілмеген, толық егілмеген, егу статусы белгісіз) азаматтарға қызылшамен ауырған науқаспен соңғы байланыста болған сәттен бастап 72 сағаттан кешіктірілмей жүргізіледі. Вакцинация үшін қызылшаға қарсы қауіпсіз және тиімді вакцина қызамық пен паротитке қарсы компонентпен қоса қолданылады.
Қызылшамен ауырған өренді өзге балалардан бөлек ұстаған жөн. Әсіресе, туберкулезбен немесе бойға сіңіп кеткен басқа да созылмалы аурумен ауыратын балаларды сақтандыру керек. Сырқат бала өзге үйге келуіне болмайды. Қызылша ауруы бар үйдің балалары мектепке, дүкенге немесе басқа да қоғамдық орындарға 10 күнге дейін бармауын қадағалаған артық емес. Жас балалар организмінің қызылша ауруына қарсы тұрып, шетінемеуі үшін олардың жетіліп, ет алуы қажет. Ал 8 айдан 14 айға дейінгі бала қызылшаға қарсы егілу керек.
- Бұған байланысты Қызылорда облысындағы эпидемиологиялық ахуал қалай болып тұр?
- Біз департамент тарапынан қызылшаға қарсы егу мәртебесін тексеруді ұсынамыз. Егер балаңыз қызылшаға қарсы егілмеген болса, екпе алу үшін тұрғылықты жеріңіздегі емханаға хабарласыңыз.
Соңғы деректер бойынша облыста лабораториялық зерттеу нәтижесімен нақтыланған қызылша ауруының 37 жағдайы тіркелді. Оның ішінде 81 пайызы 14 жасқа дейінгі балалар арасында анықталды, Ал 19 пайызы ересек тұрғындар арасында тіркелген.
Қызылша ауруына шалдыққандардың басым бөлігі қызылшаға қарсы вакцинацияланбаған.
- Әңгімеңізге рақмет.
Айта кетейік бұған дейін хабарлағанымыздай, Қызылорда облысында жұқпалы жіті ішек ауруларына ұшырағандардың 87% -ын балалар құрайды.
Биылғы жылдың 6 айының қорытындысымен облыс көлемінде жіті ішек инфекциясының 531 жағдайы тіркелді. Ол өткен жылдың осы мерзімімен салыстырғанда 3,5 есе төмен.
Облыс көлемінде тіркелген жұқпалы жіті ішек ауруларының 95%-ы Қызылорда қаласы тұрғындарынан анықталды. Олардың 87% -ы 14 жасқа дейінгі балалар арасында тіркелген. Атап айтқанда, жұқпалы жіті ішек ауруларының ұшырағандардың 68%-ы 2 жасқа дейінгі балалар үлесіне тиеді.
«Жаз айларында жұқпалы жіті ішек аурулары мерзімінен ерте піскен бақша өнімдері мен жеміс-жидектермен байланыстырады. Эпиданамнез көрсеткендей, жинау барысында 31 тұрғын мерзімінен ерте піскен жеміс-жидек пен қауын-қарбызды жегеннен кейін өздерін жайсыз сезінген. Әдетте қарбыздар маусым айында сауда сөрелерінде пайда бола бастайды. Бұл уақытта өнімдер анағұрлым қауіпті, яғни нитратпен улану деңгейі жоғары. Бұдан бөлек, гербицид, пестицидтердің мөлшерден тыс болуы да денсаулыққа кері әсер етеді», - деп мәлім етті Қызылорда облысы санитарлық-эпидемиологиялық бақылау департаментінен.