Латын қарпіне көшуге бөлінген қаражат бюджетке қайтарылып жатыр
АСТАНА. KAZINFORM — Үкімет үйіндегі брифингте Ғылым және жоғары білім министрлігі әліпбиді латын графикасына көшіру жұмыстары қалай жүргізіліп жатқанын айтты.
Министрлікке қарасты Тіл саясаты комитеті төрағасының орынбасары Эльмира Асан қазақ тілі әліпбиін латын графикасына көшіру мәселесі қарастырып жатқанын айтты.
— А. Байтұрсынов атындағы Тіл білімі институтының, Шайсұлтан Шаяхметов атындағы Тіл Қазына ұлттық ғылыми-практикалық орталығының және жоғары оқу орындарының жетекші ғалым-лингвистерін тарта отырып, латын графикасы негізіндегі қазақ тілі әліпбиінің жобасы мен орфография ережелерін жетілдіру жөніндегі жұмыс жүргізілуде, — деді комитет өкілі.
Оның айтуынша, қазақ әліпбиін латын графикасына көшірудің кезең-кезеңмен атқарылатын жоспары латын графикасы негізіндегі қазақ тілі әліпбиі мен орфография ережелері қабылданғаннан кейін әзірленеді.
Комитет өкілі латын қарпіне көшудің нақты уақыты жоқ екенін және нормативтік-құқықтық актілер құрылуы қажет екенін жеткізді.
— 2020 жылдан бастап осы бөлінген қаражат республикалық бюджетке қайтарылып жатыр, — деді Э. Асан.
Бұдан бұрын Ғылым және жоғары білім министрі Саясат Нұрбек бұл жұмыс жоспар бойынша, жүйелі түрде атқарылып жатқанын мәлім еткен еді.
