Латын әліпбиі халықаралық кеңістікке жол ашады - ұстаз пікірі

АСТАНА. ҚазАқпарат - Елбасы «Болашаққа бағдар: рухани жаңғыру» атты бағдарламалық мақаласында 2025 жылдан бастап латын әліпбиіне көшуге кірісуіміз керектігін және болашақта барлық саладағы іс-қағаздар мен оқулықтар да осы қаріппен жазылуы тиіс екенін қадап айтты. Қазіргі заманғы технологияның, коммуникацияның, сондай-ақ 21 ғасырдағы білім беру үрдісінің дамуына байланысты латын әліпбиіне көшу - заман талабы деп ойлаймын, деген пікірімен бөлісті Астана қаласы әкімдігінің «№34 орта мектеп» КММ-нің директоры Д. Рахимберлина.

Оның пікірінше, қазіргі таңда түркі тілдес мемлекеттердің көпшілігі латын әліпбиіне көшкен. Латын әліпбиіне көшу - қазақ тілінің халықаралық дәрежеге шығуына жол ашады. Қазақ тіліне компьютерлік жаңа технологиялар арқылы халықаралық ақпарат кеңістігіне кірігуге тиімді жол салады. Тағы бір маңызы - түбі бір түркі дүниесі, негізінен, латынды қолданады. Біздерге олармен рухани, мәдени, ғылыми, экономикалық қарым-қатынасты, тығыз байланысты күшейту керек.

«Латын әліпбиіне көшу - қазақ халқының алға жылжуына, жаңа заман талабына сай өсіп-өркендеуіне, болашақта еліміздің жан-жақты дамуына үлкен үлес қосып, жемісі мен жеңісін әкелері сөзсіз. Біз латын әліпбиіне көше отырып, өркениетті елдердің қатарына қосылып, тіліміздегі дыбыстық жүйелерді нақ анықтап, қазақ тілінің жазылуы мен дыбысталу кезінде сөздер қолданысындағы артық кірме сөздерден арыламыз. Сондықтан латын әліпбиіне көшу біз үшін, болашақ үшін әлдеқайда маңыздырақ.