Латыш туристеріне қастандық жасағандар құрықталды - Ақмола облысы

КӨКШЕТАУ. Шілденің 14-і. ҚазАқпарат /Жанмұрат Жанайдаров/ - Өткен жексенбі күні Ақмола облысына қарасты Целиноград ауданының Төңкеріс ауылында «Қадам» дәмханасында тамақтануға тоқтаған алты латыш азаматына қастандық жасаған күдіктілердің екеуі ұсталды,

деп хабарлайды ҚазАқпарат тілшісі.

 Осы ауылдың тепсе темір үзер төрт жігіті меймандарды ұрып-соғып жеке заттарын, екі мың АҚШ доллар ақшасын тартып алған. Жәбірленушілердің мәлімдеуінше, олар еуропалық нөмірлі Мерседес-Бенц 1113 маркалы жеңіл көліктерімен Қазақстанды туристік мақсатта аралап шықпақ болған. Бағыттары  - Алматы қаласы. Ауыр жарақаттанған меймандар Астанадағы травмотологиялық ғылыми-зерттеу институтына жеткізілген. Қазір жағдайлары жаман емес көрінеді. Алдын ала жүргізілген тексеріс барысында 1973-1980 жылғы күдіктілердің үйлеріндегі Ауди-100 көлігінен туристердің сандық фото-бейне жабдықтары, еуро, доллар, лат, рубль  тәркіленді. Қазір олардың үстінен ҚР ҚК-сінің 179-шы бабы 2-ші тармағы бойынша қылмыстық іс қозғалып, тергеу амалдары жалғастырылуда. Қылмысқа қатысты қалғандары іздестірілуде.