Лига кубогы: «Елімай» жартылай финалға берілген екінші жолдамаға ие болды

АСТАНА. KAZINFORM — Футболдан Лига кубогы турнирінің үшінші турында семейлік «Елімай» жартылай финалға берілген екінші жолдамаға ие болды.

Семейлік клуб өз алаңында «Атырауды» қабылдады. Бұл кездесуде жеңіске жеткен жағдайда олар жартылай финалға шығатын еді. 

С тобында сынға түскен командалар ойын басынан бір-бірінің қақпасы маңында жиі бой көрсетті. Ойынның 63-минутуында семейлік клубтан Жан-Али Пайруз есеп ашты. Ал 85-минутта Шина пенальтиден мүлт кетпесе, 93-минутта Даниил Пенчиков қорытынды есепті белгіледі.

Осылайша «Елімай» қарсыласын 3:0 еесбімен тізе бүктірді.

Аталған топтағы «Тұран» (Түркістан) мен «Ордабасы» (Шымкент) кездесуінде 2:2 есебі тіркелді.

Аталған топта жеті ұпаймен бірінші орын алған «Елімай» жартылай финалға шықты.

Айта кетсек, бұдан бұрын мұндай мүмкіндікке D тобынан елордалық «Астана» командасы ие болды. Ол үшінші турда сырт алаңда Қарағандының «Шахтерін» 4:2 есебімен тізе бүктірді.

Бұл топта «Каспий» өз алаңында «Жетісуды» 2:1 есебімен жеңді.

Енді 21 шілдеде А тобында «Ақжайық» (Орал) мен «Қызылжар» (Петропавл), «Қайрат» (Алматы) мен «Тараз», В тобында «Қайсар» (Қызылорда) мен «Тобыл» (Қостанай), «Ақтөбе» мен «Жеңіс» (Астана) кездеседі.