Лондонда Британдық кино және телевизия өнері академиясының марапаттары табысталды
АСТАНА. KAZINFORM — Салтанатты шара Корольдік фестиваль-холда өтті. Британдық кино және телевизия өнері академиясының (BAFTA) бас жүлдесі — үздік фильм жүлдесін Рим Папасы сайлауы туралы триллер «Конклав» алды, деп хабарлайды BBC.
«Конклав» фильмінен басқа «Үздік фильм» номинациясына «Анора», «Бруталист», «Мінсіз бейтаныс» және «Эмилия Перес» фильмдері ұсынылды.
Режиссура үшін жүлдені Холокосттан аман қалған сәулетші туралы үш сағаттық эпикалық драмалық «Бруталист» фильмі үшін Брэди Корбет алды. Бұл категорияда номинанттар арасында сондай-ақ Шон Бейкер («Анора»), Эдвард Бергер («Конклав»), Дени Вильнев («Дюна: Екінші бөлім»), Жак Одиар («Эмилия Перес») және Корали Фаржа («Субстанция») болды.
Америкалық актриса Майки Мэдисон орыстілді стриптизер бойжеткеннің өмірін баяндайтын «Анора» фильміндегі рөлі үшін үздік актриса атанды.
«Үздік актер» номинациясында Холокосттан АҚШ-қа қашып келген ойдан шығарылған мажарлық сәулетші Ласло Тот туралы «Бруталист» фильмінде басты рөлді сомдаған Эдриен Броди үздік танылды.
BAFTA сыйлығын көбінесе «Оскарға» дайындық деп атайды – жеңімпаздардың есімдері көбіне киноакадемиктердің дауыс беру нәтижелері болжайды. Биылғы «Оскар» сыйлығы 3 наурызда тапсырылады.
«Анора» фильмінде екінші пландағы рөлі үшін ұсынылған ресейлік актер Юра Борисов жүлдесіз қалды — оны Киран Калкин («Нағыз ауырсыну») алды.
Ол Борисовтан сондай-ақ «Алтын глобус» табысталуында да озып шықты.
Ағылшын тіліндегі емес ең үздік фильм болып режиссер Жак Одиардың «Эмилия Перес» криминалдық комедиялық мюзиклі танылды.
Британдық режиссер Франц Бемнің Ресейдің Украинаға қарсы кең ауқымды соғысының басталуы туралы «Тас, қайшы, қағаз» фильмі «Британдық үздік қысқаметражды фильм» номинациясында үздік танылды. Басты рөлді сомдаған — украиналық актер Александр Рудинский.
* Үздік фильм — «Конклав»
* Көрнекті британдық фильм — «Конклав»
* Үздік актриса — Майки Мэдисон («Анора»)
* Үздік актер — Эдриен Броди («Бруталист»)
* Екінші пландағы үздік актриса — Зои Салдана («Эмилия Перес»)
* Екінші пландағы үздік актер — Киран Калкин («Нағыз ауырсыну»)
* Үздік режиссер — Брэди Корбет («Бруталист»)
* Ағылшын тіліндегі емес ең үздік фильм — «Эмилия Перес»
* Балалар мен отбасына арналған үздік фильм — «Уоллес пен Громит: Ең жабайы кек»
* Үздік британдық қысқаметражды фильм — «Тас, қайшы, қағаз».
Еске сала кетсек, өткен айда америкалық кино өнері академиясы «Оскар» сыйлығы үміткерлерінің тізімін жариялады.
