Лондонда ЕҚЫҰ-ға қатысты екі жақты және халықаралық қатынастардың көптеген мәселелеріне байланысты пікір алмасулар болды

ЛОНДОН-БРЮССЕЛЬ. Мамырдың 2-сі. ҚазАқпарат /Ержан Оспанов/ - Осы аптада ҚР Сыртқы істер министрінің орынбасары Константин Жигалов сыртқы істер министрліктері кеңесі ауқымында Ұлыбританияның Еуропа істері бойынша министрі К.Флинт,

Форин офисі дипломатиялық қызметінің жетекшісі П.Риккетс, ЕҚЫҰ Парламенттік Ассамблеясының британдық мүшесі Т.Ллойд және лорд Боунес, елдің сыртқы істер ведомствосының түрлі департаменттері директорларымен бірқатар кездесулер өткізді, деп хабарлайды ҚазАқпарат ҚР-ның Лондондағы елшілігіне сілтеме жасап.Кеңес барысында ЕҚЫҰ-ға қатысты екі жақты және халықаралық қатынастардың көптеген мәселелеріне байланысты байсалды пікір алмасулар болды. К.Жигалов Қазақстанның ЕҚЫҰ-ға төрағалық етуіне жасап жатқан дайындығы туралы әңгімеледі, сондай-ақ ол ҚР-ның ЕҚЫҰ-ны күшейтуге ықпал ететінін және оның үш жақты өлшемін тиімді толықтыратынын атап өтті. Форин офистің жетекшісі ҚР-ның 2010 жылғы төрағалығы кезінде оған Ұлыбритания тарапынан жан-жақты көмек болатынын қазақстандық делегацияға жеткізді. К.Флинт пен П.Риккетс «Еуропаға жол» мемлекеттік бағдарламасының жүзеге асырылуы туралы ақпаратты қызығушылықпен тыңдады және оны ЕО-ның Орталық Азияға қатысты стратегиясына тиімді үйлестірудің қажеттігін айтты. Британдықтар қазақстан-еуропа ынтымақтастығының жедел дамып келе жатқандығын атап өтті және екі жақты қатынастың жоғары деңгейіне жауап беретін ҚР-ЕО жаңа келісімін әзірлеуге қолдау көрсетілетіндігін жеткізді. К.Жигалов ҚР Сыртқы істер министрі М.Тәжиннің Ұлыбританияның сыртқы істер министрі Д.Милибандқа Қазақстанға ресми сапармен келуіне арналған шақыруын табыс етті.Қазақстан-британ кеңесіне ҚР-ның Ұлыбританиядағы елшісі Қ.Әбусейітов қатысты.